Vunz naeuz:“Bouxgaenx mbouj miz hix gwn imq, bouxgik mbouj dai hix ngaiz iek.” Gij vah neix couh gangj haeuj ndawsim gyoengqvunz bae.

Yiz Ciz lauxsae dwg boux lauxsae Sawcuengh gou, de gaenxguh caeuq fouzsei okrengz cungj gamjdoengh gou, gikcoi gou! De neix raiz faenz- cieng Sawcuengh youq Bingzgoj Si okmingz raixcaix.

Ranzcoj Yiz lauxsae youq ndaw rungh, gaxgonq, vunzmbanj gwndaenj gig gungzhoj. Yiz lauxsae lij iq seiz, daxboh de couh gvaqseiq lo, de miz seiq beixnuengx, de dwg boux lwgdaeuz, gauhcungh bizyez le, couh dauqma ranzmbanj bang daxmeh guh reih guh naz, ndaejhoengq couh bae langh cwz langh yiengz.

Yienznaeuz hong nyaengq, hoeng, Yiz lauxsae cungj mbouj lumz coenz vah daxboh gvaq:“Sou itdingh aeu bae hagdangz, itdingh aeu ndeindei doegsaw.” De roxndeq ndeindei doegsaw ngoenz- laeng cij yungzheih ra gwn ra daenj, ndeindei doegsaw cij ndaej gaijbienq dieg youq, gaijbienq seiqvunz. Ndigah, Yiz lauxsae ngoenzngoenz cungj dwg bonj saw mbouj liz fwngz, maz saw de cungj yawj, cingq dwg:

Lwg ranz hoj le roxsoq vaiq,

Daiq boux nuengx neix bang boux de,

Bonj saw gyangfwngz cungj mbouj ce,

Vunzmbanj haenh de maenh daih’it.

Hoeng, seizhaenx de hai dou yawj saw, cungj deng vunz ndaw mbanj riu de gik guhhong, hix riu de bamz, mbouj rox hwnzngoenz, cungj byaep naeuz:“Seizneix doegsaw lij miz yungh dem ha?” De couh gven dou mboet youq ndawranz yawj saw, doeklaeng, Yiz lauxsae youh bae hagdangz Sawcuengh Bingzgoj doeg Sawcuengh, dauqma ndaw mbanj son vunzmbanj hag Sawcuengh, youh son lwgnyez hag Vahgun, de guh maz baenz maz, haibak rox eu fwen, roengz bit baenz faenzcieng, mizseiz haenh de naeuz:

“Rox raiz Sawcuengh rox eu fwen,

Bak boux dwen daengz bak boux haenh,

Gij gojgaeq de gangj mbouj caenh,

Miz mingz maenh gvaq vunz lajmbwn.”

Yiz lauxsae raiz faenzcieng、 eu fwen baenzlai, bouxbien haenh gij faenzcieng de, canghfwen gyaez eu gij fwen de raiz, doeklaeng, de ndaej diuh daengz ndaw yienh bae biensij sawfwen Fwenleuz, youh ndaej daengz densidaiz dang gicej, gvaqlaeng guh fudaizcangj, gak boux baengzyoux beixnuengx dwen daengz de, cungj haenhgyoeggyoeg. De dwg boux canghraiz Sawcuengh ciemdingh Gvangjsih Minzcuz Bau, dwg bouxcienzciep Fwenleuz Fwencuengh, de sij seiq bak lai bien faenzcieng caeuq fwensei, fat youq《Gvangjsih Minzcuz Bau》《Sam Nyied Sam》daengj doenghgij bauganh gwnzde.

Yiz lauxsae gig naeksim son gyoengqvunz hag Sawcuengh、Fwenleuz, lij heuh bouxyah de doengzcaez daeuj son Fwenleuz. De lij laebdaeb banh caet geiz “Aen Ban Son Sawcuengh Mbouj Aeu Ngaenz Bingzgoj Si” caeuq song geiz “Aen Ban Son Raiz Faenzcieng Sawcuengh Mbouj Aeu Cienz Bingzgoj Si”, hagseng miz vunz Bingzgoj, hix miz vunz Denzdungh、vunz Denzyangz、vunz Sihlinz daengj, gyoengqvunz rox de hai ban, couh doq buetrobrob doxcomz gvaqdaeuj hag.

Bouxlaux naeuz “bouxgaenx bungz ndit, bouxgik deng fwn”, youh naeuz “faex hung roeg daeuj coh, sim soh baengzyoux lai”. Yiz lauxsae bouxvunz gaenxguh, simndei, ukgyaeuj lingz, bouxyah de hix dwg vunz yienghneix, ndigah, caencik baengzyoux bouxboux cungj maij songde. Songde guh maz cungj guh ndaej baenz, guh ndaej swnh, saedceij gvaq ndaej ngoenz beij ngoenz hwng. Doeklaeng, de youq ndaw singz cawx dieg hwnq geij caengz laeuz, youh cawx ranzsanghbinj, caencingq bienqbaenz vunz ndaw singz, song boux lwg bouxboux cungj coengmingz lingzleih, bouxboux roxsoq rox ra, daengx ranz vunz vuenyungz raixcaix.

Yiz lauxsae lumj duz roegfungh daj ndaw rungh mbin ok, neix couhdwg bouxgaenx miz gwn.