Bingdoih Gozminzdangj,

Doxcanj doiq dauqlaeng,

Rox geijlai dwgcaengz,

Bienqbaenz bing baijyiengh.

Ndaek daeuz Ciengj Gaisiz,

Ndawdungx miz dajsuenq,

“Baihndaw andingh gonq,

Baihrog conx guh laeng”.

Hungzginh youq baihbaek,

Caux laeb Sanj-Ganh-Ningz,

Laux Ciengj mbouj gamsim,

Lij diuh bing bae dwk.

Cunghgung gaij fuengcim,

Laemxsim dingj Yizbwnj,

Gouq guek saeh youqgaenj,

Doengdienh daengq vunzbiengz.

Guek yaek mbouj baenz guek,

Gag doxbuek guhmaz,

Caemh aen goek faen nga,

Gen ga hab doxbaengh.

“Beixnuengx gaej doxceng,

Gap rengz doiq baihrog”,

Cingqheiq singsing gok,

Daengx guek hemqfaenfaen.

“Itngeih·gouj” yindung,

Nauh ndaej hoengh dangqmaz,

Fanj Yizbwnj “Cinhvaz”(侵华),

Daihgya hemqhumhum.

Gungcanjdangj okdaeuz,

Maeuz doengjit cienqsienq(cansen),

Comz daengx guek ligliengh,

Cienzmienh dingj bingfangz.

Aen hoih Vajyauzbauj,

Fuengcim caux ndaej deng,

Caez liemx ga liemx gen,

Hai rengz dingj vunzrog.（19）