Ngoenzgyaj vujyiz angqvauvau,

Simj sauj go au bae youzlangh,

Lwgnyez gaenlaeng aensim angq,

Miz riu miz gangj fajnaj hai.

Yizcingz sam bi sim mbouj langh,

Cungj mbouj simsangj naj saepsat,

Caenh muengh binghdoeg dai seuq sat,

Gizgiz moqyat cungj angqyangz.

Senhbu langhhai angq dahraix,

Seizneix cwxcaih youh vaiqvued,

Gofaex gova angq biu nyod,

Lwgnyez caez buet bae guhcaemz.

Guek raeuz gingjdiemj ndei youh lai,

Couh lumj va hai gyoengqvunz maij,

Roen gvangq youh lai fuengbienh byaij,

Saedcaih youh vaiq youh swnhsim.

Baihrog gyangdoengh gyoengq va yieng,

Guhhong gaenjcieng ndaej cuengqsoeng,

Ndaej baengh aendangj mbouj guhhong,

Ngoenzneix daengx ranz doengzcaez langh.

Bya heu raemx saw vunzlai maij,

Bin bya dangh raemx byaij henz daemz,

Doxiu okrog bae guhcaemz,

Gyoengqvunz caezcaemh gvaq ngoenzgyaj.

Bineix ngoenzgyaj vujyiz raez,

Vunzlai maijgyaez youz gizgyae,

Gizgiz gingjdiemj guh ndaej ndei,

Doenghgij bouxyouz eiq dangqmaz.

Bae youzlozyenz bae benz dat,

Mbouj lau mbwn ndat caeuq hanh lae,

Muengh bae lienh ndang lienh ceiq ndei,

Gyoengqde ngonz ndaej gyae youh sang.

Lwgnyez bae youz dem cihsiz,

Swhyenz caeu miz lai baenz gyoengq,

Ngoenzgyaj vujyiz raeuz ndaejhoengq,

Doxiu caezcungq(caezcaemh) bae damqra.

Doenghgij ndeigwn baij baenz baiz,

Yinx daeuj vunzlai lumj rwi mbaj,

Gij feih cienz daeuj gyoengqvunz ngah,

Gij maez mbouj caj caeux rim bak.

Vunz lai vunz daih youq gingjdiemj,

Mbouj miz sing siemj caez huzndei,

Lwgnyez dingqnaeuz vunz lai gyaez,

Caezcaemh guh’angq mbei hix fag.

Boux guh cinghseuq guh ndaej ndei,

Caenhrengz baujceiz(baujciz) gingjdiemj seuq,

Bouxyouz gwn gij doxgaiq liux,

Gag dawz nyapnyaj beuj bae comz.

Dangj raeuz mbouj lumz simnduj de,

Cungj mbouj luenh ce gij daihvah,

Ngoenzneix couhdwg aen ngoenzgyaj,

Gyaudoeng gingjcaz lij hwnjban.

Cehcan yinzyenz vih bouxyouz,

Ndigah ngoenzgyaj you bouxwnq,

Doenghgij gunghyinz sam ban swnj,

Caenh muengh cagaenj lai guhhong.

Bouxbing fuengzre vih guekcoj,

Mbouj lau sinhoj vih bouxminz,

Vih guek vih minz gaenx lienh bing,

Guh daengz dwk hingz gij hoenxciengq.

Bae daengz guek rog bae youzlangh,

Giet baenz cingzngeih angq dangqmaz,

Caezcaemh doxcienz gij vwnzva,

Gyoengqraeuz daihgya maij raixcaix.

Bouxyouz guek rog daeuj youzlangh,

Doenghgij fazcanj caen da raen,

Haisim yiengjsouh gij ndeigwn,

Liujgaij vwnzva Cungguek raeuz.

Liujgaij vwnzva raeuz guekgya,

Cingzngeih daihgya caez coicaenh,

Seiqgyaiq huzndei raeuz guhhaenq,

Lajbiengz beksingq haenh dangqmaz.

Seizgan ngoenzgyaj vujyiz raez,

Gak yiengh ginghci ndaej fazcanj,

Mizik saenqhwng raeuz lajmbanj,

Doengh bouxguhnaz angq dangqmaz.

Yamq ok douranz bae youzlangh,

Cingzngeih raezrangh cungj simvuen,

Saenqhwng lajmbanj daihgya dwen,

Bouxdaeuz ngonz ndaej gyae youh gvangq.