Vih haeujlaeg guhsaed gij vah youqgaenj Siz Ginbingz cungjsuhgi gvendaengz couqmaenh gij eiqsik caezcaemh Cunghvaz Minzcuz caeuq gij iugouz fanghloz youqgaenj Gvangjsih, haeujsim aeu couqmaenh gij eiqsik caezcaemh Cunghvaz Minzcuz gyamaenh coicaenh gak minzcuz doxgiet buekguh, mboengqneix, Nanzningz Si daiqdaeuz youq gih raeuz laebbaenz Aen Yenzgiuvei Couqmaenh Gij Eiqsik Caezcaemh Cunghvaz Minzcuz.

Aen yenzgiuvei neix cawjdaeuz dawz aen rap cujciz hezdiuz、yenzgiu lijlun、gyauhliuz yozsuz、vunz cam aeu hoizdap gezcwz、son’gyauq lwnhgangj daengj, dawz cauhlaeb aen ranzmbanj cingsaenz caezcaemh Cunghvaz Minzcuz guh dazyinx, haeuj- laeg yenzgiu hwnqguh aen ranzmbanj vuenyungz baenzmiz caezcaemh、aen ranzmbanj doxbang huzndei、aen ranzmbanj habyouq ndangcangq naihsouh gyaeundei、aen ranzmbanj henzguek onjdingh bingzan（lajneix heuhguh “haj aen ranzmbanj”） daengj. Aen de hwnqguh ndei buek dieggiek caeuq aen doih yenzgiu, doigvangq gij gingniemh youq ndaw segih hawsingz ceihleix hongsaeh minzcuz gihcwngz lumjbaenz Aen Segih Banzlungz daengj, yenzgiu lijlun caeuq cauhmoq saedguh guh’ok cingzcik daeuj, gangj ndei gij goj minzcuz doxgiet baenaj Nanzningz.

Baezlaeng, Nanzningz Si yaek caenhrengz hwnqguh aen gih guhyiengh couqmaenh gij eiqsik caezcaemh Cunghvaz Minzcuz, caezsim comzrengz hwnqguh “haj aen ranzmbanj”, laebdaeb uet rongh aen ciubaiz gim, doidoengh ginghci gwnzbiengz youh ndei youh vaiq hwngfat.

（韦尹璇 / Veiz Yinjsenz）