“Dinglingling”, aenhauh roengzdangz ci yiengj, gyoengq doengzhag foengxfaufau buet ok gyausiz, bongh coh cauhcangz. Gyoengq doengzhag boux caenx boux, gou sai bae buenq diuz mingh cij buet daengz laj laeuz, gyahaeuj aen doih guh’angq gingdiemj——Duzyiuh coemj gaeqlwg. Gou sang gvaq vunzlai, dangyienz couh dwg dangguh “duzyiuh” yakrwix lo.

Hainduj guh’angq, gou vaiqvet bongh coh gyoengq “gaeqlwg”. Hoeng gyoengqde lumj rox mbin nei, baez youh baez ndoj deuz lo. “Gaeqmeh” guhdaeuz haenx lumj mbouj gamj saenq nei yawj “gyoengq lwg” de, habhoz dwk mbouj dingz ngaek gyaeuj. Gyoengq “gaeqlwg” daekeiq vauvau haenx caezcupcup deuqnyex gou naeuz：“Daeuj ha, yawj mwngz ndaej dawz gyoengqdou baenzlawz yiengh?” Gij vah yawjsiuj vunz haenx gik gou engq buekguh, “caepcawq ndei ciepsouh gou fatguengz me?” Gou gangjriu naeuz, fwt hwnq ndang, bongh coh “gaeqlwg”.

“Gaeqmeh” fwt aj “fwed”, gou coh swix, de hix coh swix; gou coh gvaz, de hix coh gvaz; gou baenq hop ndeu, de hix riengz gou baenq hop ndeu…… Hoeng, “gaeqlwg” baihlaeng de dinga riengz mbouj ndaej —— Duz “gaeqlwg” ndeu deng gyoengqdoih rag laemx. Haha! Gou baez coemj hwnjbae gaeb dawz “gaeqlwg”, duzde buekmingh cukcak, vad- doengh gij “fwed” de, yungh rengz bek gou. Neix baenzlawz dwg “gaeqlwg”? Caen lumj dwg “duz ak doxhoenx ndaw gyoengq gaeqlwg”ha! Gou deng “gaeqlwg” coemj laemx, seiq ga gutgoz, lawz lij miz saek di yiengh “duzyiuh” dem.

Yawj gij yiengh vadgae gou, daihgya riuhaha, gangj gou:“Gij yiengh ak ndwi, gizsaed dwg ndaek huq nyieg rumz ci couh laemx ndeu.” Gou hozndat dangqmaz, hwnq ndang dauq coemj gvaqbae. “Dinglingling” aenlingz hwnjdangz sawqmwh yiengj lo, daihgya riugaekgaek baez swenj couh sanq, coh ndaw ban buet bae ……

Naengh youq gwnz diegnaengh, gou lij baenzbaenz mbouj lumz “duzyiuh coemj gaeqlwg”, neix daihgaiq dwg gij yinxdaeuz guh’angq gingdiemj ba!

(Sanggvanh Cinyangz raiz

Lingz Hinghningz hoiz)