Gou dwg Bouxgun, vunz Guengj- doeng, daj seiziq couh riengz daxboh daxmeh youq Namzningz gvaq ndwen- ngoenz, dou hix gvaq Sam Nyied Sam. Sam Nyied Sam dwg aen cietheiq Guengjsae miz daegsaek ndeu, youq ngoenz neix guh gak cungj hozdung hoenghhwd.

Caiq gvaq geij ngoenz couh daengz Sam Nyied Sam lo, gyoengq- vunz bwh ndei mbawraeu、mbaw- gyaemq、vuengzgae caeuq haeuxcid, aeu daeuj guh haeuxnaengj haj saek.

Ngoenz Sam Nyied Sam haenx, ranznden cungj naengj haeuxnaengj haj saek, seiqhenz rang’vauvau, gou nyaenx mbouj ndaej ndwnj myaiz goekgoek. Mbouj gvaq geijlai nanz, ranznden couh soengq haeuxnaengj haj saek daeuj, hawj dou cimzcimz gij haeuxnaengj haj saek Bouxcuengh. Miz seiz gou hix heuh daxmeh guh haeuxnaengj haj saek hawj gou, daxmeh bingzseiz nyaengq raixcaix, de couh bae gwnzhaw cawx ma hawj gou gaij ngah.

Sam Nyied Sam ngoenz neix, daxmeh son gou dumq gyaeqgaeq, daxmeh naeuz:“Raemxgoenj le, sien byoeb feiz bwh, feiz mbouj ndaej daiq hoengh, mienxndaej aen’gyaeq youq ndaw rek dek aj lo, caiq aeu dawh leuj aen’gyaeq fanndang, hawj gyoengqde deng ndat yinz doh, aen- gyaeq youq ndaw rek couh mbouj lau dek lo.” Gou ciuq gij vah daxmeh gangj haenx dumq gyaeq cug le, dawz gij gyaeq cat doh caet saek, gij gyaeq couh lumj gyapbangx lai saek lai yiengh nei. Gou dawz gij gyaeqgaeq neix cuengq youq ndaw daehbuh, bae bakmbanj ra gyoengq doih bungq gyaeq. Gou lau gij gyaeqgaeq youq ndaw daehbuh “doxmoeb”, couh menhmenh byaij bae.

Bakmbanj nauhyied raixcaix!

Gyoengq lwgnyez sam haj vunz humx youq itheij, bungq gyaeq beij sawhingz. “Ba!” Aen gyaeq mbup le, gyoengqvunz riuhoho. Gou caeuq daegnuengx gak dawz haj aen gyaeq- gaeq bae, sam hingz caet saw. Dou bok gij byuk gyaeqgaeq vaih haenx bae, gwn gij gyaeq diemzswdswd rangfwdfwd. Daxmeh lwnh dou nyi, lwgnyez Bouxcuengh bungq gyaeqgaeq yaek bungq bae gak cungj mbouj swnhleih, gouz bingzan ndangcangq gitleih, aen’gyaeq byawz bungq mbouj dek, hamzeiq dwg de maj ndaej youh cangq youh coek.

Diuq fouxfaexsaux dwg aen hozdung hagdangz moix bi Sam Nyied Sam cungj aeu guh ndeu. Ngoenzgonq Sam Nyied Sam, ban dou aeu lienh diuq fouxfaexsaux, daeuj daengz gwnz cauhcangz, gou raen geij diuz faex- saux raez hung bingzbaiz baij youq gwnz namh, roek boux doengzhag ndaw ban faenbied naengh youq henz faexsaux hung. Moix song boux vunz gaem song diuz faexsaux haemq iq, gaen gij cezcou “haihab, haihab, haihab”, fatok gij sing sawj vunz miz rengz haenx, bouxdiuq caemh gaen “haihab, haihab, haihab, haihab” gij cezcou de daeuj diuq, couh mbouj lau deng faexsaux geb din lo. Doengzhag dub faexsaux “dugdag dugdag”, gij sing goksasa, gyoengqvunz gaen gij cezcou diuq hwnjdaeuj. Gyoengqde din vaiq ndang mbaeu diuq gvaqbae, diuq dwk caezcupcup, ga gyoengqde diuq roengz geh faexsaux couh vaiq lumj duz biengzbeih yaeg raemx nei. Gij sing angq gokhuhu, goemq gvaq le gij sing faexsaux haenx, dingjranz cungj deng byoekfan gvaqdaeuj lo. Gou yawj gyoengq doengzhag loengh ndaej baenzneix angq, hix nyaenx mbouj ndaej siengj sawq mbat ndeu, hoeng youh miz di yousim, saeklaeuq gou mbouj rox diuq, gaen ndi hwnj cezcou, gaz din lo, baenzlawz guh? Yienznaeuz gij foux dwg Bouxcuengh diuq, gou mbouj dwg Bouxcuengh, hoeng gou hix siengj hag ne. Mwh gou yaemhywx mbouj dingh, gyoengq doengzhag rag gou gvaqbae caeuq gyoengqde diuq. Ngamq haeujbae diuq, ga gou mbouj gaen ndaej cezcou, faexsaux geb din gou lo, gou nyaenx mbouj ndaej hemq “aeyo aeyo”. Gojnaengz fouxfaexsaux mbouj hab- ngamj gou ba! Gou gag baenzneix ngeix, hix caeuq doengzhag gou gangj. “Baenzlawz mbouj hab ne? Mwngz cijaeu lai lienh, couh hag ndaej rox. Mwngz yaek saenq swhgeij, gyayouz! Gou daiq mwngz itheij diuq.” Boux caemhdaiz gou yien fwngz gou, gij doengzhag humx yawj haenx hix gujli gou, nai gou mbouj dingz. Gou bienq ndaej gagsaenq lo, mbouj geijlai nanz gou hix diuq fouxfaexsaux sug lo. Ngoenz daihngeih, ban dou biujyienj le “fouxfaexsaux laiyiengh”, gou hix camgya lo, lij ndaej daengz bouxyawj haenhndei dem! Gou roxnyinh gig miznaj!

Sanglinz dwg aen ranzcoj daih- ngeih gou. Sam Nyied Sam youh daengz lo, dou hix haeuj mbanj riengz fungsug, caeuq Bouxcuengh itheij gvaq ciet, dou gamjsouh daengz le gij heiqfaenh ngoenzciet noengz- nwdnwd, gamjsouh daengz le gij daih yungzhab gak aen minzcuz. Gak aen minzcuz raeuz couh lumj ceh mak- sigloux nei, gaenjmaed doxgiet youq itheij, gvaq gij saedceij vuenyungz angqyangz haenx. Gou dwg Bouxgun, hoeng gou haengj aen ciet Sam Nyied Sam Guengjsae neix.

(boux lauxsae son raiz:Bwz Caijlanz/白彩兰)