Bonjbauq siusik（gicej Cau Dwzfeih） 4 nyied 19 hauh, aen hoih fatbouh cek saw 《Sawloih Hung Sawndip》 nem baez ciendaez gyangj- coz “gij gietsig vwnzva Gun Cuengh doxyungz：Sawndip” youq Swcigih Duzsuhgvanj banh. Aen hozdung neix dwg Swcigih Duzsuhgvanj、Gvangjsih Minzcuz Dayoz、Gvangjsih Minzcuz Cuzbanjse cawjbanh.

《Sawloih Hung Sawndip》 dwg cek saw bien sou gij sawgeq Sawndip Bouxcuengh lai bi doxdaeuj soucomz cingjleix de, dwg cek saw hongdawz Sawndip ndeu. Cek saw neix daeg- diemj yienhda： Daih’it, sou cihsaw lai. Cek saw neix cihmoeg dwg cihsaw dandog, gungh laeb miz 16500 lai diuz cihmoeg, 90 fanh cihsaw; daihngeih, yaembiu cinjdeng. Moix cih Sawndip cungj yungh Sawcuengh gyoepyaem caeuq gozci yaembiu raiz doegyaem deihfueng de, hawj bouxdoeg mbouj doengz dieg gangj Vahcuengh deih- fueng caeuq boux mbouj rox Vah- cuengh hix doeg ndaej deng; daihsam, lwnh eiqsei ndaej cinj. Moix aen diuzmoeg baihlaj baijok gij eiqsei de maqhuz lai; haujlai Sawndip ra goek daengz byai liux, leixswnh gij eiqsei gyoengqde miz maz ietraez gvanhaeh, caemhcaiq bouj naeuz. Daegbied youqgaenj dwg coenz laehgawq ndaw saw ok cungj naeuz cingcuj daj dieg lawz ok. Ndaw saw moix aen cihmoeg cungj naeuz cingcuj gij swzsing moix aen cih; daihseiq, bien miz aen biuj busouj genj cih caeuq aen biuj yinhcez genj cih, fuengbienh bouxdoeg cazyawj.

Gwnz gyangjcoz, boux cawjbien《Sawloih Hung Sawndip》、Gvangjsih Minzcuz Dayoz Vwnzyozyen boux yenzgiuyenz Mungz Yenzyau caeuq boux lauxcangh minzcuzyoz Vangz Fungyenj、boux yenzgiu minzsuzyoz Luz Yaujginz hopheux “Sawndip dwg gij laehcingq denjhingz Cunghvaz Minzcuz doxcunz doxgyau doxyungz” damqlwnh, daj Sawndip goekrag、yienjbienq caeuq gij yenzgiu cwngzgoj seizneix aeundaej, damqlwnh doengh- gij yenzgiu cwngzgoj neix doiq baujhoh、cienzswnj minzcuz vwnzva caeuq couqmaenh gij eiqsik caez- caemh Cunghvaz Minzcuz miz gaenx- maenx cozyung.

Mungz Yenzyau naeuz, cek saw neix ndaej yo cihsaw、yo yaem、yo eiqsei Sawndip, ndaej rapdawz aen goengnaengz cienzswnj vwnzva ndei Bouxcuengh, yungh cek saw hongdawz neix, coengh boux guhhong yenzgiu cingjleix sawgeq Bouxcuengh、boux gyaez vwnzva ndawbiengz Bouxcuengh caeuq canghfwen Bouxcuengh、laux- sae son Cuengh Gun song vah saw daengj doeg vwnzyen Bouxcuengh.

Ngoenzhaenx lij soengq saw dem, mbiengj oksaw Gvangjsih Minzcuz Cuzbanjse soengq saw hawj Gvangjsih Minzcuz Dayoz Vwnzyozyen、Swcigih Duzsuhgvanj、Gvangjsih Saujsu Minzcuz Gujciz Baujhu Yenzgiu Cunghsinh、Gvangjsih Feihvuzciz Vwnzva Yizcanj Baujhu Cunghsinh、Nanzningz Si Sinhhingh Minzcuz Hagdangz.