4 nyied 11 hauh, comzyawj couqmaenh gij eiqsik caezcaemh Cunghvaz Minzcuz, bi 2024 “Sam Nyied Sam Gvangjsih·aen ciet angq Betgveiq” vwnzva lijyouz binjbaiz hozdung youq Nanzningz Byacinghsiu haimuq, hozdung cawjdaez dwg “Sam Nyied Sam hoenghhwd haenqrengz byaij lohmoq”. Swcigih Dangjveij suhgi Liuz Ningz、Swcigih cujsiz Lanz Denhliz、Swcigih Cwnghez cujsiz Sunh Daveij、Cunghyangh Vangjsinban fucujyin Niuz Yizbingh daengj daeuj daengz hozdung yienhciengz, caeuq vunzlai gak cuz caez gvaq ciet.

Rumzraeuj ci fanhfaed, gyaeuj- nga bakva hai. Ngoenzciet Bya- cinghsiu, geizsaek mbinfefe、cumhva lailang、sing fwen rwenzhap, yienh- ciengz angqyangzyangz. Banhaet 9 diemj, Liuz Ningz、Lanz Denhliz、Sunh Daveij、Niuz Yizbingh daengj yamq haeuj hozdung yienhciengz, dingq ndaek gyong roq laz、dingq fwen ciuhgeq、yawj fouxgyongraez Yauzcuz, canghndaekgyong Bouxcuengh ndaek sam sing nyenz caemhcaiq doeg saw danqhaenh le byaij daengz henz dah, baek ngaliux roengz namh bae, eiqsei dwg goheu doekrag、ndaem roengz maqmuengh.

Bineix “Sam Nyied Sam Gvangj- sih·aen ciet angq Betgveiq” cawj- hoihciengz hozdung yienhciengz, nei- yungz lailang ndeiyawj、hingzsik lai cungj lai yiengh. “Angq youz Gvangjsih”“gij feih Gvangjsih”“Gvangjsih gyaeuget” “Cungguek ndeiraeuh”“Dunghmungz lai yiengh” 5 aen mbanj feihyiz, cungdenj langhbaij Gvangjsih yinhyoz、gijgwn ndei、man daengj feihyiz hanghmoeg, comzyawj feihyiz miz daegsaek aen swngjgih wnq caeuq Dunghmungz guekgya feihyiz hanghmoeg biujyienj, gig miz daegsaek Gvangjsih、feihyinh Cunghvaz、fungcingz Dunghmungz. 5 aen mbanj ndawgyang laeb miz gailaeuj、gaicaz、gaidangz、gai guh- caemz gohgi、 gai cauh’eiq vwnzva, yienh’ok Gvangjsih doxgaiq lai、hwngfat cwngzgoj, gak miz daeg- saek、ndeindei doxcaemh, vwnzva ciuhgeq、 fapceih gohgi “bienqndang” naemj mbouj daengz, AI gisuz、heiqci seizhwng、vunzgihgi bujfaz langh bonjsaeh daengj gig ndeiyawj. Liuz Ningz、Lanz Denhliz、Sunh Daveij、Niuz Yizbingh daengj doq byaij doq yawj, seiz mbouj seiz dingz din loengh, caeuq bouxhek doxcaez gangjgoj, angqyangz raixcaix.

Aen hothoh “minzcuz doxgiet Sam Nyied Sam” doedok diuz sienq- meh couqmaenh gij eiqsik caezcaemh Cunghvaz Minzcuz, dangciengz boq- cuengq go 《Gyaez Cunghvaz Raeuz》 angqvauvau, gwnz diegnywj bingzbwd gvangqlangh vunzlai gak cuz dox- comz giz ndeu、 ciengq go diuq foux, nauhyied raixcaix. Liuz Ningz、Lanz Denhliz、Sunh Daveij、Niuz Yizbingh daengj byaij daengz ndawgyang boux daibyauj vunzlai bae, caeuq caezgya fwngz doxdaz caez diuqfoux, langhbaij le gij cingzngeih naekna Cunghvaz Minzcuz doxgiet hoengh、minzcuz doxgiet ranz vunz ndeu.

“Siz Ginbingz cungjsuhgi haenh Gvangjsih dwg aen gih guhyiengh minzcuz doxgiet baenaj daengx guek.” Liuz Ningz naeuz, aeu haeujlaeg gvancez doeksaed gij swhsiengj youq- gaenj gyagiengz caeuq gaijndei hong minzcuz Siz Ginbingz cungjsuhgi, aeu couqmaenh gij eiqsik caezcaemh Cunghvaz Minzcuz dangguh gij sienq- meh gak hangh hong daengx gih, gyavaiq doinyoengx hwnqguh aen gih guhyiengh couqmaenh gij eiqsik caezcaemh Cunghvaz Minzcuz, caez- hoz cauhlaeb aen gyaranz cingsaenz Cunghvaz Minzcuz caemhmiz、hwnq- guh aen gyaranz caezcaemh baenzmiz vuenyungz、aen gyaranz doxbang doxcoengh doxhuz、aen gyaranz hab- youq souhlaux gyaeundei、aen gyaranz bien’gyaiq onjdingh bingzan, laeb- daeb cauh gij binjbaiz vwnzva miz daegsaek “Sam Nyied Sam Gvangjsih” “Liuz Sanhcej” daengj, hawj boux- minz gak cuz doxcunz doxgyau doxyungz, lumj ngveihsigloux nei gaenjndaet got youq doxcaez, hawj “haj aen nyinhdoengz” cap rag Betgveiq daihdeih laeglaeg、yungz- haeuj lwed bouxminz gak cuz bae.

Ciuq cam rox, bineix “Sam Nyied Sam Gvangjsih·aen ciet angq Bet- gveiq” hozdung yaek laebdaeb guh ndwen ndeu, swcigih caengzmienh cujciz haiguh “fungcingz Gvangjsih Bouxcuengh noengzgwd” “minzcuz dijyuz lwenqndei”“doxiek youz Gvangjsih”“e vangj angqyangz cawx”“huzndei youz Betgveiq”haj aen bouhfaenh gungh 25 aen daihloih hozdung, gak aen si laeb gih hix giethab daegsaek deihfueng、vwnzva miz daegsaek bonjdieg guh “Sam Nyied Sam” baenzroix hozdung.

(Cinz Yizcwz Couh Yuzyij daj 《Gvangjsih Yizbau》 aeu daeuj hoiz)