“Laebdaeb doek fwn haujlai ngoenz, rum itdingh maj rim suen lo.”Gyanghaet, gou ngamq hwnq, daxmeh couh baij yinvu hawj gou, “yaep ndeu gou yaek cienq yw hawj daxbuz, mwngz couh bae ndaw suen cingleix rum.”Daxmeh naeuz, couh hawj gou vuenh haiz, daenj mad- fwngz. Gou deng daxmeh coi le, daeuj daengz ndaw suen.

Cingq lumj daxmeh liuh daengz nei, rum youh sang youh noengq, maj rim suen liux. “Rum lai baenzneix, ciemz daengz mwhlawz ha!” Yienznaeuz miz di mbouj nyienh, hoeng gou lij dwg gungj hwet nyinhcaen ciemz. Caenhguenj raemxhanh dumz buh liux, hoeng gou mbouj yietnaiq, roengzrengz guhbaenz gij yinvu daxmeh. Seizgan faen dem faen gvaqbae, mwh gou ciemz go’nywj ceiq doeklaeng hwnj- daeuj, hwet gou naet raixcaix.

Gou ngamq yaek aeu gij rum cingleix okdaeuj haenx umj bae henz, sawqmwh yawjraen gokciengz lij miz nyumq nywj ndeu lumj vamiuz loegyeuyeu, gou danq sing heiq naek ndeu:“Hai, siengj mbouj daengz yinvu lij caengz guh sat ha!” Gou diem amq heiq ndeu gungj hwet laebdaeb ciemz nywj, yaep ndeu nywj gokciengz couh ciemz liux lo.

Doeklaeng guh yinvu liux lo, gou diuqbwngbwng, angqangq yangzyangz dauq daengz ranz caeuq daxmeh iugoeng:“Daxmeh, gou ciemz rum ndaw suen liux lo, mwngz yaek haenh gou ndeindei bw!” Daxmeh iet mehfwngz hawj gou, riuangq naeuz:“Ndei, gou seizneix couh bae suen gvej di byaekgep, guh gyaujswj byaekgep hawj mwngz gwn!” Daxmeh doq naeuz doq byaij bae suen.

Gou youq ndaw ranz deq ha deq, siengj daengz yaep ndeu couh ndaej gwn gyaujswj byaekgep homfwdwd, ngah ndaej raemxmyaiz lae. Hoeng deq le haujlai nanz, daxmeh lij caengz dauqdaeuj. Geizgvaiq, suen liz ranz dou mbouj gyae, gvej di byaekgep hix mbouj yungh geijlai seizgan ha! Gou deq mbouj ndaej lo, couh gipgip muengzmuengz buet bae suen.

Daxmeh seizneix ndwn youq ndaw suen, yawj gokciengz ndoq- ndangndang haenx fwtngawz. “Dax- meh, baenzlawz la?” Gou hemq. Daxmeh cienq ndang gvaqdaeuj, daengx le gou da ndeu. Ndaw sim gou baez gaenj, siujsim cam:“Dwg gou ciemz rum ciemz mbouj seuq ma?” Daxmeh diem amq heiq laeg ndeu, byaij daeuj coh gou, naeuz:“Mwngz dwg mbouj dwg loek byaekgep gizneix ok la?”“Ha, neix dwg byaekgep?” Gou vix nyup gomiuz lumj rum haenx cam. “Daeuj, mwngz daeuj mupmup song go ‘nywj’neix, miz maz mbouj doxdoengz.” Daxmeh gip song go nywj yienh hawj gou. Gou dep gyawj mup, go ndeu miz feih nywj faex hom moq, go ndeu miz feih byaekgep hom manh. Aiya, gou cauxhux la! Gou aeu byaekgep dangguh rum, ciemz seuq lo!

Daxmeh bekbek aen gyaeuj gou, danq amq heiq naeuz:“Ngoenzneix dwg mbouj ndaej gwn gyaujswj byaekgep lo, gou lij dwg daiq mwngz nyinhrox byaekgep ba!”

Hai, danghnaeuz mbouj lujlaj, gou couh ndaej gwn gyaujswj byaekgep van bak lo!

(Huzbwz Vujhan Si Cingh- sanh Gih Cinghcingh Myaubiz Beizyin Yozyau Linz Gaijyenh raiz/Lij Yanghlenz hoiz)