Ceh baenz le, doek roengz doem bae, gvaqlaeng youh did nyez, sengmaj. Gienh saeh neix bonjlaiz gig swhyienz, gig hableix, siengj mbouj daengz miz naed ceh ndeu cix aenvih yienghneix famh goenj rin ndeu lo.

Haenx dwg goenj rin geqgak ndeu, dingqnaeuz de ceiq maij ancingh, de guh maz cungj guh ndaej onjmaenh dangqmaz. Geijlai bi daeuj, mboujlwnh gwnzbiengz miz bienqvaq baenzlawz hung, de cungj dinghdingh youq ndaej, baumaenh aen yiengh sangj hix mbouj sangj saekdi ndeu. Mbouj yungh gangj, de nyinhnaeuz bonjfaenh miz yawjfap lai, hix hozraez lai. Ndigah de naemj sij saw lwnhgangj gij yawjfap bonjfaenh. Ndaw aen giva de miz bouh saw cezyoz ndeu, dingqgangj ndawde baudaengz doenghgij ciendaez hungmbwk laeg- daeuq yienghneix: Lwnh mbouj bienqdoengh dwg aen gvilwd gwnz- mbwn lajdeih, lwnh ciengxlwenx laepngau caeuq gyaeundei, lwnh rin gietdingh mizyouq, lwnh ancingh caeuq onjdingh dwg vuenyungz doenghgij neix. Miz ngoenz ndeu, youq mwh de cingqcaih naemj aen giva cezyoz, sawqmwh miz naed ceh ndeu, caengz caj de cinjhawj, aijat roemx haeuj aen biengz de daeuj, caemhcaiq daj seizhaenx hwnj louz roengzdaeuj mbouj lizhai lo. Neix hawj de hozgaek dangqmaz. Mboujdanh gij anningz de deng nyauxluenh, caemhcaiq, gij ceiq cuet dwg, aen dijhi cezyoz de deng buqvaih lo.

Goenjrin laemxsim gaijbienq cungj gugmienh neix. Hoeng neix hoj lai lo, de gawq mbouj ndaej vanzcienz mbouj nyinh naed ceh mizyouq, youh mbouj miz rengz boenq naed ceh okbae. De naemj bae naemj dauq, doeklaeng naemj ok aen banhfap ndeu lo. De laemxsim dienz cieng yiengh- neix ndeu haeuj ndaw saw cezyoz bonjfaenh bae, daezmoeg heuhguh: Lwnh naedceh yakyawj caeuq de baenzlawz buqvaih gwnzbiengz lajdeih anningz, itdingh yaek gag dai bae vaiqvaiq……

“Caj yawj lo!” Goenjrin hozraez gag gangj gag naeuz, “couhsuenq mwngz hix dwg cungj mizyouq ndeu, hoeng mwngz seng okdaeuj mbouj daengz geij ngoenz, aen iqet, youh mbouj maengh, yawj mwngz lij gyaeu ndaej geijlai ngoenz!”

Naedceh dangyienz mbouj swt de, de mboujdanh laebdaeb louz roengzdaeuj, caemhcaiq yied daeuj yied mbouj anfaenh. De gingqyienz lij diemheiq, gingqyienz lij ciengqgo dem. De maij ciengq doenghgij go gvendaengz sengmaj caeuq hwngfat. Ndaw go cungj dwg gijmaz raeujrub ha, seizcin ha, doenghgij vah neix, simangq raixcaix, gagsaenq dangqmaz.

Goenjrin hozraez bienq ndaej gikdoengh dangqmaz:“Caj yawj lo! Rumz couh yaek bongj daeuj lo.”

Yienghneix, goenjrin soqlaiz maij ancingh gingqyienz roengzsim muengh rumz bongj daeuj lo, de nyinhnaeuz rumz bongj naedceh unqnyieg couh yaek deng nit vaih, de nyinhnaeuz bonjfaenh dwg gawq mbouj lau nit hix mbouj lau ndat.

Rumz caen bongj lo, caemhcaiq dwg raq dem raq. Dwg rumznit bongj gonq, liuxle rumzndat couh daeuj. Roxnaeuz gangj, dwg rumznit daiq rumzndat daeuj, nit daiq raeuj daeuj, seiznit daiq seizcin daeuj. Dauqdaej, seizcin youq ndaw sing rumz okyienh lo.

Naedceh mbouj anfaenh mbouj- danh mbouj deng nit dai, dauqfanj did nyez caemhcaiq dok rag lo. Gaiq rag de daj laj rin ndonj gvaqbae, gaiq nyez de daj henz rin caenx okdaeuj, conh ok gwnz doem daeuj lo.

“Gaej ndaengmoj gonq, caj yawj lo!” Goenjrin lij dwg mbouj fug saw.

Yienghneix, goenjrin youh muengh fwn doek lo. Yienznaeuz, gangj caen, de mbouj maij fwn doek geijlai, hoeng de nyinhnaeuz fwn doek naedceh couh yaek deng dumh dai, de bonjfaenh lumjnaeuz dwg gawq mbouj lau dumz youh mbouj lau hawq.

Mbouj geijlai nanz, caen fwn doek lo. Mbwn myab byajraez, deih doengh bya honz. Cungj gingjsiengq neix hawj goenjrin muengh fwn doek haenx hix nyaenx mbouj ndaej saenzdedded. Hoeng, nyezoiq mbouj- danh mbouj lau, dauqfanj vuenheij ciepcoux raemxfwn, hwnghoengh sengmaj hwnjdaeuj dem. Laeddaeb geij raq fwnhung gvaqlaeng, nyezoiq bienqbaenz go daengngoenz ndeicaez ndeu lo.

“Caj yawj lo!” Goenjrin mbouj fug saw lij dwg coenz vah yienghneix.

De siengj: Godaengngoenz iq aiq maj mbouj hung, lauheiq, de maj ndaej sang di dem, couh daemx mbouj ndaej gij naek bonjfaenh, yaek sawq- mwh laemx roengzdaeuj.

Godaengngoenz iq mbouj aenvih doenghgij vahmieng neix dingz youq mbouj maj. Gij rag de maj roengz giz laeg bae ngoenz laeg gvaq ngoenz, gij ganj de ngoenz hung gvaq ngoenz, ngoenz maengh gvaq ngoenz, gij mbaw de maj ndaej ngoenz lai gvaq ngoenz. Dauqdaej miz ngoenz ndeu, godaeng- ngoenz iq bienqbaenz godaengngoenz hung lo, hai ok duj va henjgim hunghung ndeu. Va coh daengngoenz, mbouj rox naetnaiq baenq riengz daengngoenz, doeklaeng maj baenz haujlai naed ceh. Ciep roengzdaeuj, gij ceh moq youh hainduj lwnz majhung moq lo, caepcawq doek roengz giz doem moq bae, maj ok godaengngoenz moq.

Gangj daengz goenjrin siengsim haenx ne, gij saw cezyoz de dang- yienz ciengxlwenx guh mbouj baenz lo, hoeng aen gezgiz de dauq mbouj dwg mbouj ndei liux. De youq seiz nit caeuq ndat doxhoenx mbouj dingz、cumx caeuq hawq doxvuenh mbouj duenh、gij rag doenghgo con gvaq mbouj dingz gvaqlaeng, doeklaeng dek ok, bienqbaenz gij bwnh doenghgo lo.

(Yenz Vwnzcingj raiz Cwz Fanghdingz hoiz)