Ngoenzneix, mbwn gvengqcagcag, ndit rongh- yauyau. Ranz vunz dou hai ci okrog bae youzcet. Daxboh angqfwngfwng lwnh dou nyi:“Ngoenzneix, gou daiq sou bae ngonzyawj dieg ndei he, dieg ndei neix dwg Hocouh Si Bingzgvei Oujlenz Denhya Ndaembyaek Canjyez Hwzsinh Sifangih, gig ok- mingz.”

Aenci menhmenh hai haeuj diegsuen bae, aen daemzmbu ndeu sikhaek ingj haeuj lwgda daeuj. Ndaw daemzmbu, mbawmbu doxdaeb doxcaenx bu baenz vengq baengz heuswdswd, geij duj va’mbu saekhau saekhoengz haenx lumj cehcaw ityiengh cang youq cungqgyang de, gyaeugigi, hawj vunz fizfwdfwd. Neix mbouj dwg diegsien ndawsim gou ma? Gou nyaenx mbouj ndaej ciengqdoeg okdaeuj: Mbwn lamz mbawmbu heusigsig, ndit cik va’mbu nding baenz feiz.

Caj aenci dingz onj le, gou caeuq daxmeh cacoemj saet roengz ci, daeuj daengz henz daemzmbu. Gij raemxraiz gwnz mbawmbu rongh- myigmyig. Raemxraiz caen diuqbeiz ha, gyoengqde lumj roengz lae ityiengh doek youq gwnz mbawmbu henzgyawj bae, mizseiz youh riengz rumz youq gwnz mbawmbu baenqlu, gvaq yaep he couh “digdeg” saet roengz ndaw daemzmbu bae, dem byalwg angqyangz guh’angq.

Giz mbouj gyae haenx, miz aen singzbauj loekrumz daengjvidvid ndeu. Nditndat cik youq gwnz loekrumz, gwnz va’mbu, gwnz mbawmbu, gou lumj douh youq aen seiqgyaiq bouxsien nei, roxnyinh gyaeundei raixcaix.

Dou riengz diuz roen iq byaij gvaqbae, daeuj daengz aen “Ailenz Nungzcangh”. Daxboh lwnh gou nyi, neix dwg aen nungzcangh hung ndeu, ndawde gaiqgaiq cungj miz, miz giz lwgnyez guhcaemz, miz giz doxcomz ranzvunz, miz giz youq dieg gwn. Haujlai bouxhek daeuj ngonz va’mbu haenx cungj haengjheiq youq gizneix gwn donq haeuxlwgmbu he. Gijmaz dwg haeuxlwgmbu? Gou roxnyinh geizheih cam. “Neix dwg aen hoihlaeuj daegbied ndeu, gij gwn de cungj dwg aeu gij mbaw, gij va, gij ganj, gij ceh go’mbu daeuj guh.” Gou sawqmwh roxyiuj lo, danqheiq naeuz:“Gizneix mboujdan ndaej yawj va- mbu, lij ndaej cimz lwgmbu dem, caen miz yinxdaeuz!”

Youzcet gaeuq le, dou cungj sij mbouj ndaej yamq din ma ranz. Gou ing youq ndaw rungj daxmeh, dauqngeix gij seizndei yawj go’mbu ngoenzneix, doenghsim naeuz:“Gungcanjdangj couh dwg baenz mbaw baenz mbaw mbawmbu, dou couh lumj duz byalwg ndaw daemzmbu. Aenvih miz mbawmbu cw rumz dangj fwn, dou cij ndaej gvaq gij ngoenzndei vuenyungz vaiqlag neix. Neix couh dwg“go’mbu swnj dienyah, fanh gya ndaej vuenyungz”lo! Daxboh daxmeh dingq le, cungj daengj mehfwngz haenh gou.

Canjnieb hwngvuengh, swnghdai habyouq, gou daj ndawsim maqmuengh gij hong guhhoengh lajmbanj mbanjranz gou guh ndaej engq ndei, gij saedceij yinzminz engq vuenyungz, engq gyaeundei!

(Gvangjsih Hocouh Bazbu Lungsanh Siujyoz Guj Yizloz raiz Yinj Fuzgen hoiz)