2. Laeb “Vunzgviq” Guh Daeuz

Hungzginh nyuenz giva,

Gvaq baihsae Huznanz,

Gozginh senq bajgvan,

Cang hongx caj mwngz haeuj.

Bwn gaeq mbin byaifeiz,

Byawz ngeiz mbouj coemh remj,

Hungzginh bungz yungyiemj,

Wnggai senj baihlawz.

Mauz Cwzdungh daraeh,

Liuhsaeh cinj gvaq vunz,

Rox Sienghsih cang gumz,

Naeuz vunz gaej luenh byaij.

Gaej hai da gwn vi,

Mou biz soengq bak guk,

Mbouj caiq guh saehhuk,

Swiq uk hag guh gvai.

Gaej hawj duzguk haeb,

Bae ra moeb duznyaen,

Song liengx bungz cien gaen,

Baenzbaenz veq deuz ndoj.

Baihnaj hoenx bing laengz,

Baihlaeng deuz giengzdig（强敌）,

Fanjdungbai cawjlig,

Raeuz mbouj nyig byairumz.

Moeb gvaq Dahvuhgyangh,

Ciengj ndaej cawjdoenghgienz,

Hwnj Yinz-Gvei gauhyenz,

Saenzsien laengz mbouj youq.

Mauz Cwzdungh ukgvai,

Vunzlai gyo bouxgviq,

Hai hoih youq Cunhyi,

Laeb “vunzgviq” guh daeuz.

3. Cing Ndaeng Vunzdig Cuenq

Byaleix saet roengz raemx,

Byalae ndaem namhboengz,

Duzroeg mbin haeuj ndoeng,

Noucoengz raih hwnj faex.

Hungzginh haeuj diegbya,

Gizgiz nya’nyatnyat,

Dajyouzgiz baenz ak,

Dwk mbatmbat ndaej hingz.

（16）