Goj neix aeu daj 1942 nienz seizhah gangj……

1942 nienz ndwencaet cosam, Danz Yungjgiz youq Gvangjsih Sanglinz Yen aen ranz Bouxcuengh ndeu doekseng. Daxmeh de rox Ywcuengh, lij iq couh gaenlaeng daxmeh, rwz dingq da raen le de hix gyaez Ywcuengh. Aenvih de haengj hag Ywcuengh, lij iq couh riengz daxmeh hag Ywcuengh. 1963 nienz 7 nyied, Danz Yungjgiz daj swhfan yozyau bizyez le, guekgya faenboiq de bae Sanglinz Yen Gyauzyenz Cin Bwzging Siujyoz son saw. Bwz- gingdongh couhdwg dieg boux lauxcangh Ywcuengh、canghciengx- ndang Veiz Vwnz youq haenx, gizde miz Bouxcuengh、Yauzcuz comzyouq, cungj rox gij go Ywcuengh gig lai. Ndaej bungz daengz Ywcuengh swh- yenz baenzneix lai, de engqgya laemxsim bae hag Ywcuengh. De ngamq ma son saw, gyangngoenz son hajcib bet boux lwgnyez nienzgeij mbouj doxdoengz hag vwnzva cihsiz, gyanghaemh couh bae hwnjdangz son gyoengq vunzhung hag vwnzva cihsiz. Roengzdangz ndaejhoengq lij dauq- cawq coh boux vunzmbanj camhag gak cungj go Ywcuengh, mbouj geijlai nanz de couh riengz gyoengq vunz- mbanj sugrox raixcaix, gyoengq vunzmbanj cungj gagnyienh soengq gij danyw Bouxcuengh、maedfueng coj- cienz hawj de, yienghneix hawj de doeklaeng byaij diuz loh Ywcuengh dwkroengz giekdaej maenhdwd.

1984 nienz, Danz Yungjgiz caeuq yah de daeuj daengz Yinhcwngz Yen Gujbungz Cin, youq Gujbungz Cungh- yoz son saw. Caemh bi, Gujbungz Cunghyoz ok ngaenz hawj Danz Yungjgiz gyajgeiz bae Namzningz Sihgyangh Cizyez Gisuz Yozyau hag- sib Cunghyih. Bilaeng daengx gih miz binghraq ganjmau, Danz Yungjgiz baengh gij caizhag caeuq gingniemh bonjfaenh, bae mbaet aeu mbaw makmoed、mbaw faexnganqciq、mbaw byaekmen daeuj cienq baenz raemxyw hawj lauxsae caeuq hagseng daengx hagdangz gwn, ndigah bide Gujbungz Cunghyoz mbouj miz saek boux deng lah bingh, ndaej yen veiswnghgiz caeuq camh fuengzbinghlah haenh. Yaucangj hix yaengx lwgfwngzmeh haenh de! Danz Yungjgiz mbat daeuz roxnyinh hag Ywcuengh baenzneix miznaj, vihneix engqgya dingjmaenh de byaij gij loh Ywcuengh.

1984 nienz 6 nyied 28 hauh, Danz Yungjgiz gyahaeuj Cunghgoz Gungcanjdangj, baenz boux gungcanj- dangjyenz ndeu. Danz Yungjgiz mboujdan son saw, lij dingj hag、yenzgiu saw Ywcuengh, vih ca mbouj lai seiq fanh boux vunz miz bingh siu bingh siu nanh. Doengzseiz Danz Yungjgiz swhgeij hix genjcaz ok baenz binghlwedhau, bae Gvangjsih Cunghyih Yozyen、Gveilinz Yihyoz Yen hezyezgoh yw cungj mbouj ndei, de couh mboujguenj canghyw hah gag okyen dauqma Gujbungz Cin, gaengawq doekgonq geiq ndaej gij geiqloeg gag yw. Yw ndaej song bi le binghcingz lai ndei, de couh cingjgouz dauqma Gujbungz Cunghyoz son saw, itcig daengz 1994 nienz 10 nyied doiqyouh. Doiqyouh le de couh engq ndaejhoengq bae hag Ywcuengh. 1996 nienz de caeuq bouxwnq caez banh aen ban canghyw Gvangjsih Denda Yizcouh Fwnhyau, de lij caenndang bae son gij go《Cunghyih Lijlun》《Bouxvunz Cingqciengz Gaijbouhyoz》daengj. Doeklaeng hagdangz dingz guh, gyoengq hagseng aen ban canghyw cungj cienj daengz hagdangz wnq bae, doeklaeng miz haujlai hagseng guh canghyw lajmbanj、canghyw yihyen, lij mizmbangj guh bouxdaeuz yihyen dem. Cibgeij bi gvaqbae lo, bihaenx gyoengq hagseng de lij ciengzseiz dauqma yawj de, caeuq de lwnh Ywcuengh.

Vihliux Ywcuengh ndaej cienz- swnj engq ndei, Danz Yungjgiz fatbiuj 《Ywcuengh Gwnzbiengz Ndaej Yw Bingh Mbouj Miz Lwg》《Ywcuengh Gwnzbiengz Yw Ndei Song Boux “Yiengh Cunghab Ndang Gyaengj Binghcingsaenz”》 《Ywcuengh Gova- bungz Ndaej Yw Diuzgyoek Foeg》 daengj lai bien lunvwnz, haujlai yenzgiu cwngzgoj caeuq ngeihcib lai bien lunvwnz yihyoz ndaej guekgya、swcigih gak gaep mizgven bouhmonz dajciengj. Danz Yungjgiz youq 1999 nienz ndaej Gvangjsih Bouxcuengh Swcigih bingz baenz “boux canghyw maenhndei lajbiengz”, caemhcaiq de lij ndaej iucingj bae daengz Dwzgoz、Bahsih daengj guekgya guh gyauhliuz gvendaengz yihyoz.

Banneix Danz Yungjgiz gaenq geq lo, hoeng gij sim aeu Ywcuengh fugsaeh gyoengqvunz cungj mbouj bienq. De lij buekguh youq gij cansen yihyoz, lij caenndang bae son vunz ndaem moux lai Ywcuengh, bangcoh vunzlaeng hag Ywcuengh. Ciuhvunz de ceiq siengjmuengh Ywcuengh ndaej mboujduenh goeghung, seiqseiq daihdaih vih gyoengqvunz yw bingh gouq mingh.