Seiq、Byaij Cien Bya Fanh Raemx

1. Dauqdaej vih yiengh maz

Byaij Vangz Mingz lohsienq,

Haengj mauhyiemj okbing,

Hoenx dai hoenx mbouj hingz,

Sai bing youh saw ciengq.

Okbae hoenx mbouj hingz,

Haeujyingz ma gven gvaengh,

Aen dou dingj mbouj maenh,

Baenqndang cix buet deuz.

Geij boux daeuz byaij loek,

Cix deng boek daengx buenz,

Dauhleix geijlai nduen,

Cungj ciuq buen bouxwnq.

Rongzrwi lau duzgyau,

Baez deng gyauz cix sanq,

Duzguk roemx haeuj mbanj,

Vunz doxcanj ndoj deuz.

Gozginh baenz bakfanh,

Dwk famh daihbonjyingz,

Hungzginh gyoengq guenbing,

Deng senj din vuenh dieg.

Dangjcunghyangh senj din,

Bing minz hoj doxbiek,

Bouxboux sim naiqniek,

Dungxiek gwn mbouj roengz.

Seiqlengq byaj gwq maenj,

Rumz haenq fwnraq roengz,

Hingzseiq gaenq mbouj doengz,

Yoenggawq senj diegwnq.

Dangjcunghyangh senj deuz,

Gvaq seiq diuz fungsienq,

Dahsienghgyangh hoenxciengq,

Sai daihliengh guenbing.

Bing hungzginh mbouj youq,

Vunzrwix daeuj hengzmanz,

Aen mbwn deng boekfan,

Ranzranz dauq vijsij.

Dauqdaej vih yiengh maz,

Goengqbya lak roengzdaeuj,

Suhgih hen mbouj youq,

Vut dieg youh sai bing.

（15）