Laujveiz fanj cam Siujveiz:“Mwngz roekcib bi cij aeu yah, hix hawj vunz gaen mwngz guh la?” Caezgya dingq Laujveiz baenzneix gangj couh riuhaha. Siujveiz naj- hoengz lumj feiz coemh, mbouj rox baenzlawz buek goenglaux. Laujveiz naeuz:“Haexmax lwenq baihrog, gaej bae guh cungj saeh vangh neix. Raeuz yunghsim guh saehsaed, baihgwnz lingjdauj beij raeuz daraeh, raeuz guh ndaej baenzlawz yiengh, lingjdauj cungj yawj ndaej raen.”

Siujveiz naeuz:“Cinz yencangj youq mbanj raeuz gunghcoz gvaq, seizneix de dauq dieggaeuq, raeuz mbouj guh ndei hawj de yawj, yiengh- neix miz maz mbouj habngamj ne?”

Laujveiz naeuz:“Fuengzhaed binghraq baengh guh saehsaed, mbouj dwg baengh geij faj baiz byauhyij ndaej guh baenz.”

Siujveiz naeuz:“Cinz yencangj ngoenzngoenz ndaej daeuj mbanj raeuz ma? Raeuz caenhrengz guh ndei hawj de yawj mbouj wnggai ma? Mwngz uk laux mbouj rox cienq, gvaiq mbouj ndaej doenghbaez itheij gunghcoz, seizneix vunz dang yen- cangj, mwngz dang bae dang dauq cungj dwg cunhgan……”

“Byawz son mwngz gangj cungj vahvangh neix la?” Laujveiz ndatheiq vix najbyak Siujveiz fok. “Dang ganbu cungj dwg vih dang yencangj、sicangj ma? Danghnaeuz bouxboux cungj bae dang yencangj、sicangj…… Byawz dang cunhgan ne?”

Deng daxboh yienghneix fok donq ndeu, Siujveiz caiq naj hoengz- foedfoed. De roxnyinh bakbyoengq gangjvah cungcangh goenglaux lo, cingq ngvanh baenzlawz caeuq goeng- laux nyinh loek, couh dingqnyi aen soujgih ndaw daeh yiengj lo. De ciep denva, dwg yanghcangj dwk daeuj, yanghcangj naeuz Cinz yencangj gaenq daeuj daengz bakmbanj lo. De doeksaet yat, Cinz yencangj sawqmwh daengz hawj de uk doq luenh liux, mbouj rox baenzlawz guh. Laujveiz dacaengz Siujveiz baeh naeuz:“Lumj mbouj gamj bae raen nw! Cinz yencangj mbouj dwg duzguk, lau de gaeb mwngz ha?”

Siujveiz simgip ndaej saeknaj bienq bieg lumj hoi, gangj vah cungj mbouj baenz coenz:“Byawz liuh ndaej daengz de sawqmwh daeuj, raeuz cungj caengz ndaej bwh saek yiengh……”

Laujveiz riu naeuz:“Cungj lingj- dauj neix gyoengq ginzcung cij haengj! Danghnaeuz caengz daeuj couh naeuz hawj sou, sou couh ndaejhoengq bae guh gij hong haexmax lwenq baihrog bwh hawj lingjdauj yawj lo.” Raen Siujveiz najsaep najmbwng, Laujveiz caiq naeuz:“Raeb cungj saeh neix vanzlij hawj gyoengq maxlaux raeuz oknaj daiqroen cij ndaej! Hauxseng gaej yousim, gaen gyoengq maxlaux raeuz daeuj……” Laujveiz dem geij boux dangjyenz laux byaij baihnaj, Siujveiz daiq geij boux dangjyenz hauxseng gaen baihlaeng, gyoengq dangjyenz caez buet bae bakmbanj.

Bakmbanj miz diuz giuz iq ndeu, Cinz yencangj dem yanghcangj gyoengqde ndwn youq gyaeuj giuz gizde. Laujveiz daeuj daengz gyaeuj giuz gizneix, vadfwngz hemq:“Siuj- cinz!” Cinz yencangj caemh vad- fwngz han:“Laujveiz!”

Laujveiz naeuz:“Gyoengq baih- gwnz goeng’ak daeuj daengz bak- mbanj lo, vihmaz mbouj haeuj mbanj daeuj ne?”

Cinz yencangj naeuz:“Seizneix mbouj doxdoengz ngoenznaengz, gij bwtbingh sinhgvanh binghraq caengz cied, raeuz fuengzhaed mbouj ndaej cuengqsoeng. Ngoenzneix dwg ngoengzseng aen dangj raeuz, gou roengzmbanj daeuj yawj gyoengq beixnuengx, raennaj couh suenq gij cingz daengz lo. Deq daengz ngoenz binghraq cied le, gou cij daeuj caeuq gyoengq beixnuengx gwn laeuj eu fwen.”

“Baihgwnz goeng’ak yawj ndaej gyae!” Laujveiz yaengx fwngzmeh haenh naeuz. “Haxbaenh gou ngamq caeuq gyoengqdoih gangj, baihgwnz goeng’ak beij raeuz daraeh, ngeix ndaej beij raeuz dohdaengz.”

Cinz yencangj naeuz:“Haxbaenh gou dingq yanghcangj gangj lo, caenhneix fuengzhaed binghraq mbanj sou guh ndaej ndei. Bohlwg dangjyenz sou daiqdaeuz, gyoengq beixnuengx bouxboux gaen guh……”

“Gijneix dwg baengh baihgwnz goeng’ak lingjdauj rem!” Siujveiz mbouj deq Cinz yencangj gangj vah liux, couh nyaenx mbouj ndaej ok sing hung naeuz. “Danghnaeuz mbouj miz baihgwnz goeng’ak yawj ndaej cinj, yinx roen yinx ndaej deng, raeuz baenzlawz haenqrengz cungj guh mbouj baenz saeh.”

Laujveiz doiq Siujveiz ngaek gyaeuj naeuz:“Gangj baenz byongh- ngoenz vah, caenh coenz vah neix gou haengj dingq lo!”

Siujveiz dacaengz Laujveiz naeuz:“Youq dangqnaj baihgwnz goeng’ak gou couh mbouj ndaejhoengq haenh mwngz lo, yaep di haeuj ranz menh cij lai gingq mwngz song cenj laeuj.”

Laujveiz sim sangj le, ndaw uk ngeix raen gij vah doq bien baenz fwen. De yungh sing hung eu fwen:

“Ngoenzseng aen dangj raeuz,

Caez daiqdaeuz fuengzraq;

Cien fanh nanz gaej you,

Miz bonxdaeuz daiqroen.”

Cinz yencangj eu:

“Fuengzraq gauq vunzlai,

Dangjyenz daiqdaeuz guh;

Bohlwg baihnaj byaij,

Cienzdoengj daih cienz daih.”

Siujveiz eu:

“Cien fanh saeh lajmbwn,

Fuengzraq hwnzngoenz ca;

Ceiq gviq dwg mingh vunz,

Raeuz mbouj lwnh laux nomj.”

Laujveiz eu:

“Daengz ngoenz binghraq cied,

Cuengq bauq diet gingqhoh;

Eu fwen haenh comzgiet,

Gaem cenj giet daengz fiz.”

Gyoengqvunz gek dah eu fwen, mwngz eu hot gou eu hot, yied eu yied sim’angq, song hamq dah sing fwen lumj raemxlangh goksadsad……

（2 sat）