Fanj “humx dwk” baez seiq,

Ndaej Cuh Dwz okdaeuz,

Mboujguenj “bouxswix” naeuz,

Baengh geiqmaeuz bae hoenx.

“Bouxswix” naeuz ak lai,

Gag haenh gvai fouzbeij,

Raex geijlai dauhleix,

Cix gwnzceij damzbing.

Baengh Gungcanj Gozci,

Ciq fwjgyaemq dinmbwn,

Yienghyiengh ei duh vunz,

Bae cimh ndwn cimh naengh.

Aen mbwn caengz ronghndei,

Saek seiz lij fwn doek,

Raemxdah hwnj youh mboek,

Lij rox boek aen ruz.

Vangz Mingz diuz lohsienq,

Ndaej bienq baenz godaeuz,

Mozswhgoh roet haeu,

De hix naeuz gaiqbauj.

Laux Ciengj mbouj fug saw,

Gip hwnj gaw hwnj max,

Rumzyak bongjfafa,

Roemx gvaq lueg gvaq ndoeng.

Fanj “humx dwk” baez haj,

Euq mbouj gvaq godaeuz,

Yawz naeuz couh yawz naeuz,

Youz de gangj liux suenq.

“Fanjdungbai dwk raeuz,

Bakdou yaek dingj maenh,

Gaej hawj vunzdig gaenh,

Bae haenq dangj haenq laengz”.

Lij Dwz caeuq Bozguj,

Guh gaem cijveihgenz,

Ciuqbuen fap Suhlenz,

Caenhrengz bae buekhoenx.

Vunz “baujleij canloz”,

Raeuz iet hoz bae dingj,

Cien fanh vunz vutmingh,

Seihaiz ringx rim bya.（14）