Cunhgan Siujveiz ciucomz gyoengq dangjyenz haihoih, doxyaeng ngoenzseng aen dangj raeuz yaek guh maz saeh geiqniemh. Siujveiz naeuz ciengz fuengzhaed binghraq neix gaenq guh song bi lai lo, yienznaeuz fuengzhaed guhndaej habdangq mij ok maz saeh, hoeng gij binghraq bwtbingh sinhgvanh caengz cied, danghnaeuz seizneix mbouj singjsak, saeklaeuq hawj binghraq dauq fat, couh dangq ninz daengz mbwnrongh cij doek congz lo. De ciudaeuz youq ngoenzseng aen dangj raeuz gyoengq dangjyenz vih ndaw mbanj fuengzhaed binghraq guh saehndei. Caezgya dingq le cungj yaengxfwngz haenh naeuz yienghneix guh baenz lo.

Ciengz binghraq neix song bi gaxgonq sawqmwh daeuj seiz, mbouj miz vunz liuh daengz baenzneix youq- gaenj, haujlai vunz cungj nyinhnaeuz song sam ndwen couh gvaqbae lo. Goeng cungjdungj Meijgoz Dwzlangj- buj gangj ngaih dangq bok naengbiek, de naeuz gaej yungh feiq goengfou bae fuengzraq, gij binghraq neix gig vaiq couh gag cied lo. Doeklaeng, haih gyoengq Meijgoz dai bak geij fanh vunz, gij binghraq youq Meijgoz yied cienzlah yied gaenjyiuq, mbouj rox baezlaeng vanzlij dai geijlai vunz cij daengx.

Siujveiz naeuz:“Mbouj beij mbouj rox byawz ndei byawz yak, mbat beij doq hawj vunz yawj cingcuj dangqmaz. Dwzlangjbuj laepda haibak doeng gangj sae mboen, guh mbouj baenz saeh najndaem laih Cunghgoz raeuz, nyinhnaeuz vunz seiqgyaiq cungj bienq ngawz liux lo. Seizneix hawj vunz seiqgyaiq cungj yawj cingcuj, vanzlij dwg Dangjcunghyangh raeuz dazyinx ak, ciengz fuengzhaed binghraq neix gig vaiq couh gaem- haed, mij ok maz saehyak hung. Gij saeh gyae haenx raeuz mbouj gangj gonq, caezgya yawj aen mbanj raeuz, caenhgonq guh ndaej hix mbouj loek……”

“Gaej gag haenh bonjfaenh lo, mwngz naj na lai dwg lwi?” Laujveiz faek Siujveiz naeuz. “Gyoengq cunh- gan guh maz, vunz ndawmbanj lwgda ronghsagsag, lau gyoengq beixnuengx mbouj rox ma?”

Siujveiz dacaengz Laujveiz naeuz:“Gou gangj gijneix dwg goenglauz caezgya, yienghneix gangj loek ba?”

Laujveiz naeuz:“Mwngz ngamq gangj daengz Dangjcunghyangh, doq ciep gangj mbanj raeuz guh ndaej baenzlawz ndei, hawj vunz nyinhnaeuz mwngz yaek caeuq Dangjcunghyangh bingzbaiz……”

“Caengz gwn laeuj couh fiz lo, haibak luenh ndau……” Siujveiz doiq Laujveiz mbwnjbak mboenbyoed- byoed. De gangj vah sing saeq, nyinhnaeuz Laujveiz rwz miz di nuk dingq mbouj ndaej nyi. Byawz rox, Laujveiz bingzseiz rwz nuk, haihoih seiz beij byawz cungj rwzraeh. De fok Siujveiz:“Danghnaeuz haihoih mbouj hawj vunz gangj vah, maz saeh mwngz gag dingh ndaej lo, heuh caezgya daeuj haihoih guh maz ne?” Siujveiz dingq goenglaux baenzneix gangj, naj hoengzfwgfwg mbouj gamj ok sing.

Song bohlwg neix cungj dwg dangjyenz, vunzmbanj heuh songde guh dangjyenz bohlwg. Gaxgonq Laujveiz guh cunhgan, laux le daengz bi duiyouh, vunzlai hawj lwg de Siujveiz ciepban. Laujveiz doiq Siuj- veiz gig yiemz, maz saeh yawj mbouj gvaq da couh dangciengz naeuz, mizseiz vanzlij fatheiq fok, mbouj hawj naj louzcingz saekdi. Mizmbangj saeh Laujveiz guh ndaej gvaqmauh, Siuj- veiz hix mbouj fug, hoeng mbouj gamj youq dangqnaj vunzlai caeuq daxboh doxceng. Gaxgonq daxboh lienzdaemh guh ngeihcib geij bi cunhgan, vih gyoengq beixnuengx guh haujlai saeh- ndei, youq ndaw mbanj mingzmuengh gig daih, caeuq goenglaux doxceng vunzmbanj couh naeuz de mbouj gingqnaek banlaux.

Laujveiz doiq Siujveiz yiemz- haenq, mbouj dwg heuq singq gai laux hengzvang. Caenhgonq, Siujveiz guh geij bi cunhgan le, raen vunz guh seng’eiq fatcaiz simhumz, doiswz mbouj guh cunhgan, ciq ngaenz bae guh seng’eiq, de baenzlawz gienq naeuz cungj mbouj dingq. Danghnaeuz seng’eiq guh ndaej baenz mbouj youqgaenj, hoeng luet ek mbouj guh cunhgan, guh seng’eiq caiq caembonj, hawj vunz riu naeuz uengjfeiq ciengz goengfou ndeu liuh mbouj daengz song gyaeuj cungj hoengqvat, Laujveiz hujhaemz mbouj dai. Gvaqlaeng gyoengq dangjyenz daez genyi hawj Siujveiz dauqma guh cunhgan, Lauj- veiz naeuz doengh lwg bingdeuz neix mbouj haicawz gij dangjciz de cungj ndei lo, de baenzlawz lij miz naj dauq guh cunhgan ne? Gyoengq dangjyenz menhmenh gienq naeuz de, hauxseng uk mbaeu haengj sawq guh lai cungj hong, seizneix de gaenq rox gaxgonq guh mbouj deng, wnggai caiq hawj de gihvei gaij loek. Caiqnaeuz, hauxseng byaij roen doemjndoet le, baezlaeng guh saeh couh rox gag yunghsim re lo. Dingq gyoengq dangjyenz yienghneix gangj, Laujveiz conghhoz gij heiq haemz cij siu di, swnh’wngq caezgya eiqnyienh. Daj Siujveiz dauqma guh cunhgan hwnj, de doiq Siujveiz beij doenghbaez yiemzhaenq ndaej lai, bingzseiz raen Siujveiz guh maz saeh mbouj deng, couh bek daiz fok donq ndeu.

Caenhneix yen cwngfuj Cinz yencangj yaek roengz mbanj daeuj cazyawj fuengzhaed binghraq cingz- gvang, yangh cwngfuj heuh gak mbanj bwh ndei gonq, daengz seizde hawj yen lingjdauj yawj ngamjeiq. Siujveiz heuh gyoengq dangjyenz daiqdaeuz, dawz gak gya gak hoh naj ranz laeng ranz cingjleix ndei. Gijneix mbouj miz maz gangj, caezgya cungj ngaek gyaeuj naeuz ndei. Siujveiz caiq heuh gak gya gak hoh bakdou cungj venj faj baiz, gwnz baiz sij fuengzhaed binghraq byauhyij. Siujveiz vah caengz gangj liux, Laujveiz doq vadfwngz hemq dingz. Siujveiz naeuz:“Ranz gou daiqdaeuz guh, gou guh ndaej daengz, cij heuh caezgya gaen gou guh. Yienghneix miz maz mbouj deng ma?”（1）