Seizcin byajraez yiengj “lungz lungz”, fwndoek yiengj “sa sa”, fwn- doek gvaqlaeng rangzcin yaemzyaemz daj ndaw namh conh okdaeuj. Neix dwg mwh ndei mbwt rangz!

Seizcin gou caeuq gyoengq doengzbangh byaij youq gwnz Bya- gyungzlungz, itloh ngafaex haiz loeg, vamoq hai hoengh, duz roeg cijcij cetcet, gij yiengh gingjsaek gyaeundei hawj dou roxnyinh haengjheiq. Dou benz daengz dingjbya le yawjraen benq ndoengfaiz mwncup ndeu, lumj benq haij loegsaek ndeu, rumz ci gvaq, ndoengfaiz fubfab baenz langh, fatok sing “sa sa” gig ndeidingq, caen dwg hawj vunz simsoeng. Dou couh gingheij cung haeujbae, siengj gorangz ndeigyaez couh lumj duz cinglingziq ityiengh ndoj youq laj faiz, caj dou bae ra ne!

Dou dawz fagso iq dauqcawq ra, hoeng baenzlawz hix ra mbouj raen! Yienghneix dou couh bomq youq gwnz namh dauqcawq yawj, hoeng gyoengqde lumj daenj buhyo’ndang nei, ndoj youq laj goekfaex caeuq namh, caeuq dou goemqndoj ne! Gvaq yaep ndeu, gou cungjsuenq youq henz gofaex hung ndeu fatyienh le aen “gyaeuj iq” loeg ndeu lumj dwg ngamqngamq soemh okdaeuj nei, gipmuengz heuh:“Vaiq daeuj yawj, gizneix lumj miz gorangz iq ndeu!” Gyoengq doengzbangh cungj angq- faengz buet gvaqdaeuj, humx baenz aen gien ndeu, ndawde miz lwg doengzbangh ndeu cigciep aeu fwngz rag, hoeng gorangz iq mbouj doengh saekdi. Yienghneix dou sien aeu fagso youq gwnz namh veh gien luenz ndeu, yienzhaeuh mbwt namh henz gorangz ok, siujsim sisi daj ndaw namh rag gorangz okdaeuj. Yienzlaiz mbwt rangz hix mbouj dwg gienh saehcingz genjdanh ndeu ha! Miz le baez gingniemh neix, dou youh ra ndaej le geij duz “cinglingziq”. Gou rox, moix baez ra ndaej gorangz cungj dwg mbwn ndij namh hawj gij gingheij hawj dou.

Mbwn ciemhciemh laep roengz- daeuj lo, yawjyawj gij lwgrangz miz hung miz iq、miz maenh miz reg, caiq yawjyawj gij haiz dou nem rim namh, daihgya nyaenx mbouj ndaej sim’angq riu lo! Neix dwg mbwn ndij namh soengq hawj ne!

(Gyanghsuh Swngj Vaigozyij Yozyau Gu Sinhyij/raiz Lij Yangh- lenz/hoiz)