Muengh ha muengh ha, muengh bae muengh dauq muengh ndaej aen danci gou daengz lo. Gou youh sim’angq youh dungxmbouq. Gou sim’angq, dwg aenvih gou dauqdaej miz aen danci bonjfaenh lo； gou dungxmbouq, dwg gou lau hag gwih mbouj rox baenzlawz guh.

Byai singhgiz，gou caeuq daxboh daxmeh caemhcaez daeujdaengz gunghyenz. Gou caj mbouj ndaej lo, couh simgip dwk gwih hwnj gwnz danci bae, bouxlawz rox ngamq gwih hwnj bae couh laemx dwk seiq ga daengj mbwn. Seizhaenx caekhaex gou manhsaengsaeng, in dai bae! Yawj daeuj, gwih danci mbouj ngaih lumj gij gou ngeix baenzde.

Daxboh guh baez yiengh ndeu hawj gou, gaenlaeng youh son gou hag gwih. Baeznduj, gou yungh song fwngz gaem gyaeujci maenhmaenh bae. Liuxle, gou gaswix baez hamj, yungh rengz hamj gvaq daengq danci, caekhaex nod naengh roengz bae. Naengh hwnj gwnz danci gou gaswix dieb youq gwnz gaiq diebdin baihswix, ga’gvaz cengj youq gwnz dieg, da yawj baihnaj. Gaenlaeng yungh gaswix caij gaiq diebdin, ga’gvaz cengj gwnz dieg. Gou haenq- rengz haenqheiq, diem amq heiq naek ndeu, haenqrengz caij gaiq diebdin, danci cungj suenq ndaej byaij bae naj lo. Daxboh itcig youq baihlaeng rex danci, bang gou gaem maenh dawz bingz. Lienh ha lienh ha, gou laebdaeb lienh baenz buenqngoenz.

Yienznaeuz baezneix gou mboujcaengz hag rox gwih ndei, hoeng gou saenq, goengfou mbouj gaz boux miz sim, gou itdingh hag rox gwih danci.

(Gyanghsuh Swngj Danhyangz Si Sizyen Siujyoz Ngeih(10)Ban Ciengj Cwngzyingh/raiz Veiz Yen’gyangz/hoiz)