Ndwenngoenz nyaenx haemzhoj,

Raeuz byaij coh gizlawz,

Fwnz ndip feiz caengz dawz,

Baihndaw gyoq cix ndongq.

Hungzginh cib fanh bing,

Caemh diuzsim bae guh,

Caih vunzdig fungsuj,

Doxgiet guh ndaej bae.

Ok rogbya daeh haeux,

Bouxboux cix ceng bae,

Geij cib leix roen gyae,

Cuhcungj caez dawz rap.

Boux guen nem boux bing,

Caezcaemh ninz fiengznyangj,

Caez lae lwed lae hanh,

Caenmaed dangq ranz vunz.

Aen ranzlaeuz betgok,

Doengxhaemh mok laep mbwn,

Bouxdaeuz nyaengq baenz hwnz,

De lumz ninz lumz yiet.

Gujdenz dingh yenzcwz,

Gwzming baengh bouxhoj,

Cwngci guh hai loh,

Bingdoih moq laebbaenz.

5. Cien Fanh Vunz Vut Mingh

Loegcak did nyod moq,

Non daeuj coh daeuj ciuz,

Gomiuz ngaz oiq biu,

Rox ciu nengz ciu nyaenh.

Fanjdungbai daeuj hangz,

Doq guh vang guh raeh,

Mbouj miz saeh caux saeh,

Gyaux ndaej luenhfaenfaen.

Fanj “humx dwk” baez it,

Rumzbaek nit lailai,

Goengdaeuz ukgyaeuj gvai,

Haidou coux dig haeuj.

Fwjndaem cw daengx mbwn,

Vunzdig ciemq haeuj gyaiq,

Hungzginh ak raixcaix,

Hoenx baih cib fanh bing.

（12）