第02版:man
3上一版  下一版4
 
Daengngoenz Baihdoeng Mbouj Rox Doek
Yaek Hauqswnh Bohmeh
版面导航     
3上一期  下一期4
新闻搜索:  
3上一篇 2024年3月6日 放大 缩小 默认        

Yaek Hauqswnh Bohmeh

□ Lanz Gozvuj / 蓝国武
 

Boux vunz raeuz okseiq,

Ceiq baeg dwg bohmeh,

Daj seiz iq daengz geq,

Cungj bohmeh dwgrengz.

Raeuz lij youq ndaw dungx,

Meh rungx ndaej gouj ndwen,

Yied ngoenz yied simluenh,

Caeux muengh lwg okseiq.

Raeklwg gouj ndwen nanz,

Simfanz ndi miz beij,

Raeuz bingzan okseiq,

Meh cuengq heiq sim soeng.

Ganq hongranz hongreih,

Mbouj ndaej soeng saekseiz,

Bi dwgrengz gvaq bei(bi),

Mbouj hoengq seiz ndeu nauq.

Meh saek ninz ndaw dumz,

Lwg cix ninz dieg hawq,

Nyouh haex mbaeq youh lawh,

Seizlawz meh ndaej soeng?

Raeuz rox byaij rox louz,

Okdou de daeuxheiq,

Ngoenz bae naz bae reih,

Seizseiz youh ngeix lwg.

Daengz raeuz haeuj hagdangz,

Baedauq langh yungh ngaenz,

Bohmeh dak naj ndaem,

Doz ngaenz hawj raeuz yungh.

Bi gai mou gai gaeq,

Mbouj ndaej yungh saek faen,

Lwg doegsaw yungh ngaenz,

Ndangdaenj byawz ndaej cawx?

Yaek ganq lwg baenzvunz,

Bohmeh cungj mbouj soeng,

Ngoenz bae naz bae doengh,

Mbouj ndaejhoengq saekseiz.

Bohmeh caux ndi ndaej,

Lwg cix daej yaek gwn,

Yaek ganq lwg daengz gwnz,

Hwnzngoenz cengqgengz guh.

Miz lwg daeuj ciuqgoq,

Faenh donq ndi miz gwn,

Bae gai danq gai fwnz,

Fwn dumx hix deng bae.

Seng lwg mbouj yungzheih,

Ngoenz daeuxheiq simfouz,

Ganq hawj de doegsaw,

Lawh de cog baenzvunz.

Roek nyied deng dak ndit,

Cib nyied ndouq nae rumz,

Mbouj baen ngoenz rox hwnz,

Gwn ninz byawz ndaej onj?

Ganq lwg mbouj yungzheih,

Feiq haujlai goengrengz,

Daeuxheiq liux heiq dem,

Dwgrengz bouxlawz rox.

Haemh raeuz ndaej ninzndaek,

Ndang naek cij yietnaiq,

Raeuz bingh ndi gwn ngaiz,

Gai cwz dog bae yw.

Ciengx lwg ndaej lumj neix,

Cingzngeih mbouj ndaej lumz,

Ngoenzneix raeuz baenzvunz,

Gaej lumz de bouxlaux.

Bohmeh ciuh sinhoj,

Goj vihliux lwglan,

Geq le youh simfanz,

Laux lwglan famhsaeh.

De dwgrengz baenzciuh,

Geq liux raeuz gaej lumz,

Ganq bohmeh daengz gwnz,

Boiz aencingz bouxlaux.

Gaej caeuq boh doxdwk,

Boh ciengx lwg dwgrengz,

Gaej dem meh doxceng,

Meh dwgrengz gaxgonq.

Raeuz caux ndaej cienzngaenz,

Yaek baen bohmeh yungh,

Lwglan dwg de rungx,

Mbouj rox ungj geijlai.

Gyauq lwglan raeuz ndei,

Gaej vei de bouxlaux,

Ngoenzneix lwg ndi gyauq,

Cog goj dauq daengz raeuz.

Miz di ndi rox gyauq,

Yawj bouxlaux ndi raen,

Cog de geq daeuj daengz,

Hix goj raen lwgmanh.

Naeuz ciuhlwg ciuhlan,

Gaej bae fanz bouxlaux,

Guh vunz ndi miz gyauq,

Ienuengj daeuj lajmbwn.

Danghnaeuz boh dang guen,

Meh hix dwg ganbu,

Gaej muengh de ciuqgoq,

Guh vunz baengh swhgeij.

Danghnaeuz boh ga’gvez,

Meh raeuz dwg dalengq,

Ndi miz songde mengx,

Byawz seng raeuz lajmbwn.

Okseiq daeuj lajmbwn,

Mbouj baen gvai dem byamz,

Ronghndwen saek lij vangq,

Hozgvang gangj vunzraeuz.

Mboujguenj bohmeh raeuz,

Gvai huk aeu hauqswnh,

Hoj miz hawj de gwn,

Mehmbwn yawj ndaej raen.

Okseiq daeuj lajmbwn,

Guh vunz yaek roxsoq,

Ciuhgoeng daengz ciuhboh,

Roxsoq bouxboux gyaez.

Miz di ndi rox ngeix,

Baez heiq ndi doxdoengz,

Bouxboux dongx saek coenz,

De hozgaenj gege.

Hauqswnh dwg bonjfaenh,

Haethaemh mbouj ndaej lumz,

Gyaez bohmeh daengz gwnz,

Dwg bouxvunz roxsoq.

Dangh bohmeh baenzbingh,

Riengjlinj soengq yihyen,

Seizseiz dawz bangx henz,

Miz maz heuh canghyw.

Dangh de baenz gyaeuj dot,

Raeuz ok ra canghyw,

Langh de cungj cangz cw,

Raeuz dwglau dangqmaz.

De bingh ninz ndaw mbonq,

Gaenx ndomq gaenx rox couh,

Gaenx beuj haex beuj nyouh,

Gaej hawj louh sae rwz.

Byawz hauqswnh bohmeh,

Mbwn couh soengq fuk daeuj,

Bohmeh lwg doxnaeuz,

Raeuz couh ndaej fouqgviq.

 
3上一篇  
 
   
   
   


版权所有 广西民族报

联系电话:0771-5528076 5559552
传真:0771-5528087 电子邮箱:gxmzbw@163.com
地址:广西南宁市桂春路16号 邮政编码:530028
 

关闭