“Guengjsae liux mbouj hwnj”,

Daklaih Dwng Siujbingz,

Youq Baksaek hwnjbing,

Gung singz youh ciemq mbanj.

Liuz Cidanh Sanjbwz,

Gwzming guh ndaej haenq,

Vunz biengz bouxboux haenh,

Dieggoek maenh gvaq maz.

Baih Huznamz Huzbaek (Huznanz

Huzbwz),

Mwnqmwnq baek geiznding,

Ho Lungz daiq gyoengqbing,

Bang lwgminz okheiq.

Bungz Bai baez aesing,

Nungzminz nauhhumhum,

Ranghdieg Haij-Luzfungh,

Cungj boek deih boek mbwn.

Gyanghsih Fangh Ciminj,

Caemh laeb hwnj cwnggenz,

Baengh ginzcung okrengz,

Hohhen benq dieggvangq.

Huznamz Bungz Dwzvaiz,

Comz vunzlai Bingzgyangh,

Hwnjbing bae hoenxciengq,

Biengj fwj ndaej raen mbwn.

Lengqlengq miz bouxak,

Doxhap caez cit feiz,

Fwn rwed baez doek baez,

Gyoqfeiz cungj mbouj ndaep.

4. Doxgiet Guh Ndaej Bae

Lengqlengq miz gyoq feiz,

Seizseiz hoenzngeungeu,

Rumz ci raen ndongqndeuj,

Hoenzfeiz mbeuj seiqhenz.

Miz vunz laepda hemq,

Yaek heuh senj ok bya,

Naeuz ndoj ndaw ndoengnya,

Mbouj baenz maz heiqhaeuh.

Yawj song baiz geiznding,

Cap rim Cingjganghsanh,

Va’ndokgengj hai angj,

Hungzginh angq doxcomz.

（11）