Cienznaeuz doenghbaez, miz song gvanbaz, bouxsai dwg boux- raemjfwnz, mehmbwk dwg dahlwg caizcawj. Miz ngoenz ndeu, mehmbwk naeuz bouxsai:“Mwngz ngoenzngoenz raemj fwnz bae gai, cix rom mbouj roengz saek faen ngaenz, yienghneix baenzlawz ciengx ranz?” Bouxsai naeuz:“Mwngz naemj fatcaiz, couh bae laeng bohda ciq di ngaenz daeuj, raeuz bae guh gaicawx.”

Mehmbwk bae laeng daxboh ciq cib maenz ngaenz dahraix. Ciq ndaej ngaenz le, bouxsai couh cawx daeuj duz ma ndeu. Cawx daeuj gvaqlaeng, mehmbwk couh naeuz de:“Mwngz caen huk, ma cawx daeuj, de rox gwn haeux ndwi, lij ndaej bang mwngz guh maz?” Bouxsai youh naeuz:“Baenzneix mwngz couh bae laeng bohda ciq cib maenz ngaenz dem, gou cawx di doxgaiq wnq.” Caj mehmbwk ciq ngaenz daeuj, bouxsai youh cawx daeuj duz meuz ndeu.

Baezneix, mehmbwk hozgaek lo, ndaq bouxsai naeuz:“Mwngz baenz- neix guh, gij ndwenngoenz mbouj bienq ndaej ndei saekdi. Ma caeuq meuz ndaej hawj mwngz fatcaiz ha? Gvaqlaeng mwngz aeu maz bae boiz hawj daxboh gou?”

Bouxsai hix raen hojguh, youh mbouj nyaenxsim gai duzma caeuq duzmeuz bae, cijndei naeuz mehmbwk:“Yienghneix, mwngz bae laeng bohda ciq cib maenz ngaenz dem, gou bae cawx gijwnq. Gou mbouj saenq mbouj miz saek yiengh ndaej hawj gou fatcaiz!” Mehmbwk mbouj miz banh- fap, youh bae laeng daxboh ciq cib maenz ngaenz. Ngoenzneix, bouxsai baez okdou, couh bungz yah buzgeq ndeu gai aen mbaetcuk heuhguh “loengxgouzndaej” ndeu. De naeuz aen “loengxgouzndaej” lingz dangq- maz, gouz aeu maz couh ndaej maz. Bouxsai dingq le, maz cungj mbouj gangj couh cawx lo.

Dauqdaeuj ranz, de angqvauvau naeuz duzma caeuq duzmeuz:“Mbat- neix ndei lo, raeuz mbouj yungh hwnj bya bae raemj fwnz lo, yaek gwn yaek daenj, cam aen ‘loengxgouzndaej’ aeu couh ndaej lo.” Mehmbwk mbouj saenq, naeuz duzma caeuq duzmeuz:“Sou gaej dingq de, mbouj gai fwnz, de haeuxcuk hix gwn mbouj imq.” Bouxsai dingq le, aeu aen “loengx- gouzndaej” daeuj, doq sax doq gouz. Caen dahraix, cam maz ndaej maz, baez raix couh okdaeuj. Daengx ranz vunz angq raixcaix, daj neix hwnj gyoengqde ndwenngoenz gvaq ndaej vanyetyet.

Mbouj geijlai nanz, aen huqbauj neix hawj vuengzdaeq rox lo, baij bing daeuj ciengj bae. Ranz de ndwen- ngoenz youh gvaq ndaej hoj dangqmaz lo. Bouxsai baenzngoenz cangz:“Ma ha meuz ha, raeuz sat lo. Daj neix gvaqlaeng, sou couh gag bae gvaq ndwenngoenz bonjfaenh ba, gou bonjfaenh cungj gwn mbouj imq, lij baenzlawz ciengx ndaej sou ne?”

Duzma caeuq duzmeuz raen bouxcawj baenzneix gangj, ndawsim hix hojsouh raixcaix. Bouxcawj dwg- rengz ciengx gyoengqde hung, ngoenzneix bouxcawj miz nanh, gyoengqde wnggai bang de. Ngoenz daihngeih, duzma caeuq duzmeuz cam gvaq bouxcawj, couh guhdoih hwnjdin, naemj bae ciengj aen “loengx- gouzndaej” dauq. Gwnz roen, bungz dah, duzma couh aemq duzmeuz gvaqbae. Song duz de suenq dwg caemh van caemh hoj lo. Geij ngoenz gvaqlaeng, gyoengqde bae daengz ndaw singz.

Duzma naeuz:“Gou haeujbae yawjyawj gonq.” Duzmeuz naeuz: “Mbouj, gou ndang mbaeu daraeh, wnggai dwg gou haeujbae yawjyawj gonq.” Duzmeuz haeuj daengz ndaw singz, couh raen gyoengq beixnuengx vuengzdaeq cingq sax aen “loengx- gouzndaej” gouz noh gwn, couh ndoj youq henz bomqyawj. Gyoengq beix- nuengx vuengzdaeq sax liux le, aeu aen “loengxgouzndaej” cuengq haeuj aen loengxfaex hung ndeu bae. Duzmeuz raen le, guhmuengz bae caeuq duzma doxyaeng.

Duzma cam:“Mwngz gaemh ndaej liux duz nou sojmiz ndaw singz lwi?” Duzmeuz ndaengndiengq naeuz: “Ndaej!” “Yienghneix couh ndei, mwngz gaemh daeuj liux, hawj gyoengqde gaet byoengq aen loengx- faex hung haenx.” Duzmeuz rox duzma naemj guh maz lo, gaemh daeuj duz nou sojmiz ndaw singz. Gyoengq nou lau lai, duzduz gouz duzmeuz gaej gwn gyoengqde. Duzmeuz couh naeuz gyoengqde, cijaeu gyoengqde gaet byoengq aen loengxfaex yo aen “loengxgouzndaej” haenx, couh cuengq gyoengqde deuz. Gyoengq nou dingq le, cungj naeuz nyienh haenq- rengz bae guh, duzmeuz couh cuengq gyoengqde lo.

Mbouj geijlai nanz, aen loengx- faex deng gyoengq nou gaet byoengq lo, duzma caeuq duzmeuz couh rag aen “loengxgouzndaej” okdaeuj. Gwnz roen, duzma caeuq doxmeuz doxcaez okrengz, gamz aen “loengxgouzndaej” byaij. Mwh gvaq dah, duzma gamz aen “loengxgouzndaej” gvaqbae gonq, liux le dauq gvaqbae aemq duzmeuz gvaq dah. Duzma baedauq geij baez, baeg lai lo, hwnj hamq le naeuz duzmeuz:“Yaek daengz ranz lo, raeuz yietbaeg yaep ndeu gonq.” Duzmeuz mbouj yungh okrengz, mbouj baeg saekdi, gya hwnj ndawsim de naemj loengh duzma, couh naeuz duzma:“Mwngz gag yiet ba, gou aemq aen ‘loengx- gouzndaej’ dauqranz gonq.” Duzma mbouj rox duzmeuz naemj loengh de, couh doengzeiq lo.

Daeuj daengz ranz, duzmeuz couh naeuz bouxcawj:“Duzma caen mbouj dwg duz ndei, aen ‘loengx- gouzndaej’ baenzneix naek, hawj gou boux dog gag caeg aeu dauq.”

Bouxcawj saenq duzmeuz gangj, ndaq naeuz:“Caj de daeuj ranz maz cungj mbouj hawj de gwn, yawj de lij gamj mbouj gamj ndojgik!”

Daj seizhaenx hwnj, duzma moix donq dan ndaej gwn gij byaekhaeux duzmeuz gwn lw, gwn mbouj imq ninz mbouj ndaek, bouxcawj lij ndaq de:“Gwn mbouj imq couh bae gwn haex! Mwngz duz mbouj miz yungh neix, gou raen mwngz rengz hung, hawj mwngz riengz duzmeuz bae caeg aen ‘loengxgouzndaej’ dauq, mwngz cix gveng hawj duzmeuz gag guh!” Duzma neix cij rox bouxcawj vihmaz doiq de mbouj ndei, laxlawz dwg duzmeuz youq raeblaeng loengh fangz. Daj neix hwnj, duzma couh caengz duzmeuz lo.