Gou dwg geu majgyaziq ceb mboujmiz gen ndeu. Laeg yawj gou youh mbaeu youh mbang, hoeng gou ndaej mwhmwh bauj bouxcawjiq, mbouj hawj de haeujlumz dwgliengz.

Hoeng bouxcawjiq gou dwg boux rubrab, ciengzseiz geiq gyaeuj lumz rieng, hawj gou saedceij dwgrengz, dauqcawq louzlangh.

Ngoenzhaenx baenzringz, bouxcawjiq daeuj daengz sizdangz, daek le haeuxbyaek, hai gwn lumj guk. Bouxcawjiq gwn ndaej hanh rim gyaeuj, swnhfwngz duet gou roengzdaeuj, cuengq youq baihlaeng. Gwn haeux liux, de lumj dwg lumz gou gyae daengz henzmbwn, ndwn hwnjdaeuj uetuet bak, baetbaet gumq couh bae lo. Gou daengx ndang yungh rengz, yaek hawj bouxcawjiq dingz din, hoeng de baenzlawz dingqnyi ndaej ne, ai!

Seizgan it faen it miux gvaqbae lo, sizdangz yienzbonj nauhnauh yiedyied bienqbaenz hoengq- vauvau, bouxlawz hix mbouj fatyienh gou hojlienz gag youq gizneix. Lajhaemh, yahheiz sizdangz yaek roengzban lo, gyoengqde ndaep daeng lo, youh haep dou lo. Seiqhenz laepcupcup, gij heiqfaenh dwglau gyuem youq henz gou. Sim gou diuqbubbub, lumj miz boux lwgnyez diuqbeiz ndeu youq henz diuq- yoekyoek. Bouxcawjiq mwngz vaiqvaiq daeuj gouq gou ya!

“Gvangdang——”, dou hai lo, daeng hix rongh lo, duz ngaeuz sugrox ndeu okyienh youq bakdou. Cij raen bouxcawjiq buet vaiqvaiq gvaqdaeuj, lauz gou hwnjdaeuj, daenj youq ndang. Lijdwg feihdauh sugrox、dijvwnh sugrox、sing’yaem sugrox haenx, bouxcawjiq, gou siengj mwngz siengj yaek dai lo.

Gangjnaeuz bouxcawjiq daj neix baenaj couh doiq gou ndei, hoeng ciuzdaih gaij ndaej, bonjsingq nanz gaij. Youq dangz goqdijyuz ndeu, bouxcawjiq caeuq gyoengq baengzyoux de guhcaemz guh’angq, guh dwk hanh lae hanh roenx, mbouj naeuz saek coenz couh duet gou roengzdaeuj, swnhfwngz gveng youq gwnz danzva.

“Daeng daeng daeng——”, doiq din iq ndeu caij youq gwnz ndang gou, louz le song riz din uekcuek. Fuk mbouj baenz doiq, hux mbouj baenz dan, doiqnaj youh cung daeuj daeg lwgmbauq ndeu……

Saekliemq miz boux lauxsae ndeu gip gou hwnjdaeuj, cuengq daengz giz ra lingx gaiqdoek. Youq gizneix gou bungz daengz haujlai beixnuengx caez deng nanh. Diuz hungzlingjginh ronghsien ndeu doiq gou naeuz:“Majgyaziq, bouxcawjiq mwngz itdingh hix dwg bouxrubrab!” Gij cagdiuq henj venj youq henz laebdaeb naeuz:“Dwg ya, dwg ya, caeuq bouxcawjiq gou ityiengh!” Gizyawz gienh buhrog、aen liengj、aen mauh hix cungj caemh sing naeuz:“Bouxcawj gou hix dwg baenzneix!”

Bouxcawjiq gou ha, maqmuengh mwngz gaij ndaej aen mauzbingh vaih geiq gyaeuj lumz rieng neix, gyaezhoh gou ndeindei, mbouj hawj gou caiq louzlangh lo.

(Cinz Yijcez raiz Lij Yanghlenz hoiz)