Daxmeh cawx duhheu ma ranz, yaek aeu daeuj cawj cuk gwn, gou roxnyinh geizheih lai, couh laeglemx aeu di guh cehfaen, yaek aeu daeuj ndaem.

Gyoengq duhheu naednaed cungj dwg yiengh luenzraez, daenj buhvaq heu, cungqgyang lij maj miz aen bak hung ndeu, lumjnaeuz doiq gou gangjnaeuz: “Vaiqdi ndaem gou haeuj ndaw namh bae ba!” Yienghneix, gou dawz aen cenjceij ndeu, ra namh caeuq sa ma, cuengq haeuj ndaw cenj bae, vat baenz geij aen gumz iq, dawz duhheu cuengq haeujbae, caiq haem hwnj- daeuj, doeklaeng dwk raemx hawj de, couh yienghneix ra aen ranz cwxcaih ndeu hawj gyoengq duhheu. Gvaq le ngoenz ndeu, gou geizheih dwk vat naed duh ndeu okdaeuj, cij raen naedde gwn gaeuq raemx, maj ndaej bizbwdbwd. Gou cuengq naed duhheu neix haeuj namh bae. Ngoenz daihsam, naedde biq diuzlinx youh hau youh oiq okdaeuj, lumjnaeuz gangj: “Gou lij hat, caiq hawj gou gwn di raemx ba!” Yienghneix, gou youh rwed raemx coq de. Ngoenz daihseiq, diuz linx duhheu neix yied daz yied raez, gyoengq doengzdoih de cungj ndonj ok lajnamh daeuj, naednaed daenj aen mauh iq heuloeg, muenghyawj seiqcawq, lumj- baenz naeuz:“Gwnz biengz neix rongh- sagsag, geijlai gyaeundei ha!” Ngoenz daihhaj, gyoengq duhheu cungj duet mauh bae, hai baenz limqduh, cungqgyang limqduh ndonj song mbaw iq soemsi saekhenj okdaeuj. Gyoengqde youq laj ndit raeujrubrub neix, roxnyinh gijmaz cungj dwg moqsag. Ngoenz daihroek, gij mbaw soemsi haenx youz henjoiq bienqbaenz ndaw henj daiq loeg, caemhcaiq maj sang haujlai. Gyoengq ngazduh lumj- naeuz hix rox aen dauhleix “hwnjsang yawj gyae” haenx, gyoengqde cungj buekmingh maj, siengj yawjyawj gij funghgingj engq sang engq gyae haenx. Ngoenz daihcaet, ngoenz daihbet, gyoengq ngazduh bienqbaenz saekloeg, engqgya cangqmaenh, cungj maq- muengh ngoenzcog gyaeundei haenx.

Gou youh ra ranz moq hawj gyoengq ngazduh, senj gyoengqde daengz ndaw boemhva bae, hawj gyoengqde youq ndaw rungj mbwn- namh cwxcaih sengmaj, hai ok va gyaeundei, giet baenz duhheu lailai bae.

(Cuh Haijyinh raiz Veiz Yennaz hoiz)