Nanzcangh guh gijyi,

Sij cingqngeih faenzcieng,

“Bet·Caet” gwnz hoihciengz,

Siengliengz byaij roen moq.

Lajmbanj ceng daemznaz,

Coemh haz feiz dawz hoengh,

Caez hwnjdaeuj bauhdoengh(baudung),

Dawz cungq ok cwnggenz.

Siengh Gan(湘赣) ranghdieg neix,

Seiqcawq caenh geiznding,

Gak mbanj caez doenghning,

Ca dangbing hoenxciengq.

3. Laeb Gunghnungz Hungzginh

Miz dingz vunzguhnaz,

Gyonj nga vunz meizgvang,

Mbangj bing Gozminzdangj,

Doxcanj daeuj guhmieng.

Laeb gunghnungz hungzginh,

Sanhvanh lingh gaij bien,

Ndaw donz daengz ndaw lenz,

Aeu dangjyenz guh goek.

Bouhdoih senj haeuj bya,

Nda laeb gwnhgidi,

Raemx lueg yienznaeuz iq,

Lae baenz rij baenz vaengz.

Cap haeuj Cingjganghsanh,

Ra dieg dangj fwnrumz,

Gizneix lingh aen mbwn,

Guen bing vunz bingzdaengj.

Vangzyangzgai byasang,

Angqyangz yawj gak dieg,

Gizgiz hoenzsiu bieg,

Lumj vasiek (va faexsiek) bongj rumz.

Gvangjcouh Suhcwngfuj (Suhveizaih Cwngfuj),

Ndaej senhbu laebbaenz,

Fanjdungbai hozhaemz,

Heiq haeb faenz haeb heuj.

Lwgcuengh Veiz Bazginz,

Ndawsim ngeix daengxcungq,

Daiq vunzmbanj baudung,

Nauh ndaej hoengh dangqmaz.

（10）