Gaxgonq, raeuz cungj ciengq hot gohoengz geq:“Gwnz haij hai ruz baengh bouxhai, fanhfaed majhung baengh daengngoenz……” neix. Dwg ha, aen dangj raeuz couhdwg boux hai ruz ndei ndeu, de gyaez gij lwgminz de, doifan sam goengq bya hung, laebbaenz Cungguek moq he, youh daiq gij lwgminz de buekmingh haenqguh, gij saedceij lwgminz de ngoenz ndei gvaq ngoenz. Miz aen dangj neix guhdaeuz, guekcoj raeuz itdingh ndaej saedyienh aen loqsiengj Cungguek cienzmienh fukhwng!

Geij bi neix daeuj gou ciengzseiz dingqnyi doenghgij lwgnyez eu hot fwen neix:

Lwgminz guek raeuz cienz duetgungz,

Cungj dwg baenghgauq aen dangj raeuz;

Bouxlaux bouxiq angqvau naeuz,

Daengzcog gyoengq raeuz engq vuenyungz.

Aen dangj laebbaenz it bak bi, daj hojndoq nanz yawj, aeu yiengh mbouj miz yiengh haenx, menhmenh bienqbaenz le seiqgyaiq ginghcidij daihngeih hung, lwgminz haeux duh fungsou, gwndaenj mbouj you, gij ci hung ci iq gwnz roen lumj duzmoed buen ranz. Gij vunz guek wnq hozhaenz raixcaix.

Doenghgij gisuz, daegbied dwg gauhgohgi cungj deng saefueng guekgya fungsoj, hoeng gohyozgyah guek raeuz mbouj lau gannanz haemzhoj, laebdaeb haeujlaeg yenzgiu damqra, doeklaeng cauh ok le ginghdan caeuq yenzswjdan. Aen Veisingh Bwzdouj guek raeuz gag naemj gag cauh, cauh fuk le lwgminz; 5G ndaej saedyienh, Meijgoz dahoengz luenh gangj vah, apbik guek wnq mbouj ndaej yungh 5G gisuz guek raeuz. Hoeng daengz seizneix lij miz haujlai aen guekgya baijbouh le 5G vangjloz Vazveiz Gunghswh guek raeuz. Saehsaed cwngmingz: Mboujguenj seiqlig baihrog baenzlawz humxsaek, saj maz ciuyaem, cungj laengz mbouj ndaej guek raeuz fazcanj, lwgminz guek raeuz coengmingz lingzleih, gamj buekmingh haenqguh, youh maij cauhmoq, guek raeuz itdingh ndaej saedyienh aen loqsiengj Cungguek cienzmienh fuk- hwng!

Binghraq gyuek lajbiengz, lwgminz guek raeuz dingq dangj vah, hajcib roek aen minzcuz raeuz caezsim、doxgiet hoenx binghraq, gak vunz gak guenj bonjfaenh, dangjyenz souj bakloh, mbouj hawj binghraq gyuek haeujma; gyoengq boux canghyw ciuqseiz daengz dieg gyuek binghraq, gouqyw gij vunzbingh; boux gohyenz haeujlaeg yenzgiu gij yw gouq vunzbingh, roxnaeuz yw fuengzre. Ak ha, mbouj geij nanz, guek raeuz gaemhanh le binghraq. Guek wnq youh hozhaenz dangqmaz!

Seiqhenz cienz daeuj le hot fwen:

Binghraq daeuj, raeuz mbouj lau,

Miz dangj hawj raeuz daeuj baiz you;

Dangj cijveih, sim raeuz raeuj,

Gyoengqvunz caez re ndei lairaeuh;

Binghraq dai, binghraq naeuh,

Gyoengqraeuz yaengx boi daeuj ndoet laeuj!

Bouxdaeuz guek raeuz miz coenz vah ndeu naeuz: Daengx seiqgyaiq dwg ranz ndeu, miz nanh raeuz aeu bang. Yienghneix, guek raeuz cungj dawz gij banhfap fuengzre binghraq cienz daengz lajbiengz gak dieg; boux canghyw caeuq gij yw bouxbingh laebdaeb ok guek, daengz gak guek bae yw bingh vunz. Yienghneix gij vunz guek wnq youh danqhaenh guek raeuz. Mwngz gangj, daengzcog guek raeuz lawz mbouj saedyienh loqsiengj Cungguek cienzmienh fukhwng ne?

Miz coenz vah geq yienghneix naeuz:“Va ndeu gag hai mbouj dwg cin, bak va caez hai cin rim suen”, yienznaeuz guek raeuz cienzbouh duet- gungz, hoeng lajbiengz lij miz haujlai haujlai vunz caengz gaijgez ndaej gwn imq daenj raeuj, lij miz di guekgya hoenxciengq mbouj daengx, miz di guek cungj baij godaih, doiq guek wnq vix fwngz luenh gangj bedbed, yaepseiz couh yaengx diuz faexhung cicaiz. Guek raeuz haenqrengz guh it rangh it loh, byaij diuz roen caezcaemh hozcoz, doengzcaez canh ngaenz, cauh fuk lwgminz. Gij vunz lajbiengz cungj miz lwgda yawj, byawz ndei byawz yak, ndawsim cungj rox, caeuq byawz hozcoz, ndawsim miz soq.

Geijcib bi daeuj, guek raeuz gangj daengz guh daengz, caencingq vih seiqgyaiq lwgminz cauh fuk. Seizneix, guek raeuz bienqbaenz le aen guek hung daih’it gunghyez, gij vunz ndawbiengz hix gig haengj yungh gij doxgaiq raeuz, lumj liz mbouj ndaej gij huq guek raeuz nei. Giyez ok guek caeuq gij guek wnq doxgap, bangcoengh dangdeih ginghci fazcanj, gungganq dangdeih yinzcaiz, demgya ngaenz ndaw daeh gyoengqde, hawj gyoengqde menhmenh gvaq saedceij ndei. Bangcoengh gij guek wnq hwnqguh gauhdez, roxnaeuz suijdencan, demgya vunz soq couhnieb, coicaenh dangdieg ginghci fazcanj. Raeuz itcig gangj saenqyungh, guh daengz caezgap caez- canh, caeuq gyoengqde doxndei doxhuz caemhyouq, mbouj miz saekdi haephangz.

Guek raeuz itcig genhciz doxhuz caezyouq, fanjdoiq capfwngz gij saeh guek wnq, fanjdoiq gungjbu cujyi, doengzseiz youh genhgez henhoh cujgenz guekcoj caeuq diegguek caezcingj. Guek raeuz gangj daengz guh daengz. Gij lizsij geijcib bi cungj cwngmingz, guek raeuz couhdwg yienghneix. Guek raeuz youq gwnz seiqgyaiq cungj rapdawz cwzyin guek hung. Lenzhozgoz heuh baij bing bae doenghgij guek cabluenh haenx guh gij hong henhoh hozbingz, guek raeuz mbouj gangj lai coenz couh baij bing bae, caemhcaiq nyinhcaen guh gij yinvu henhoh, cungj ndaej daengz cwngfuj caeuq lwgminz dangdeih danqhaenh.

Mboujguenj seizlawz, roxnaeuz gizlawz, guek raeuz cungj dwg vih lwgminz cauh fuk, cungj dwg genhciz huzndei caezyouq, doxgap caezcanh, caezcaemh fazcanj, doeklaeng cungj hwnghoengh, cungj ndaej gvaq ngoenz ndei, daengzcog itdingh ndaej saedyienh aen loqsiengj Cungguek cienzmienh fukhwng!