Doengh boux dungxsaej soh,

Mbouj rox dwg yaemmaeuz,

Bouxrwix ciengj guhdaeuz,

De maedmaeuz hengzyak.

Caemh doih mbouj doxhuz,

“Cunghsanh” ruz oksaeh,

Guh dangjvu cingjleix,

Saed ra saeh hawj vunz.

“Seiq·it ngeih”saehgienh,

Roengzlingh luenh gaj vunz,

Ciengj Gaisiz cw mbwn,

Lwnh vunz naeuz “cingdangj”.

Boux daiqdoih mbouj gvai,

Ep vunzlai gyau cungq,

Giuhcazdui(纠察队) fwngzhoengq,

Yienghyiengh soengq hawj vunz.

“Caet·it haj” cwngben,

Bakcungq cienq dauqlaeng,

Doxgap bienq doxcaengz,

Baengzyoux baenz vunzdig.

Ningz Han ginhcizdonz,

Song gonz gyonj ndaej rap,

Song nga dah doxgap,

Raemxrongz cakhumhum.

“Ningznyienh gaj baenz sauh,

Mbouj hawj lauq saek vunz”,

Vangh Cinghvei gaemz rumz,

Cienfanh vunz deng nanh.

Fanjdung vanzyanghdonz,

Ngonz ndaej cinj hingzseiq,

Buekluenh gaj nungzvei,

Mok laep deih laep mbwn.

2. Dawz Cungq Ok Cwnggenz

Caez bae guh seng’eiq,

Hujgeiq gag doxmaeuz,

Fanjdungbai dang daeuz,

Naeuz yaek mied Gungdangj.

Ya Mingzhan(夏明翰) maenhndei,

Deng lwed lae vut mingh,

Doengxhwnz mbouj bingzcingh,

Ndiusingj cienfanh vunz.

Raemj gyaeuj mbouj youqgaenj,

Caenh aeu byaij deng roen,

Dai bae mbouj doek hoenz,

Lij miz vunz gaen daeuj.

Go’nywj mbouj lau feiz,

Seizcin youh dauq maj,

Gofaex mbouj lau cax,

Raemj gvaq ngaz lij biu.

Gyoengq Gungcanj Gozci,

Guh cijsi lwnh naeuz,

Rek souhringz gaenq saeu,

Donq caeuz linghvaih cawj.

Raen hingzseiq mbouj doengz,

Dangj roengzfwngz gaijcuj,

Danggya vuenh vunz guh,

Hainduj naemj caux bing.

（9）