Soengq bae bi duzdoq(douq),

Bimoq duzlungz mbin,

Doeng bae coux seizcin,

Bouxboux sim raeujrub.

Soengq bae bi duzdoq(douq),

Bimoq duzlungz fan,

Fouqgviq soengq daengz ranz,

sim vunz van lumj oij.

Ndwenngoenz lumj raemx lae,

Ngoenzhwnz bae mbouj dauq,

Roegcin mbin daeuj bauq,

Lungz daeuj bauj bingzan.

Ndwenngoenz lae lumj raemx,

Raeuz gaemh de mbouj dingz,

Bi duzlungz haidin,

Lumj vacin hai moq.

Bi duzlungz haidin,

Lumj vacin hai moq,

Gou miz haujlai goj,

Doq fwen lwnh daihgya.

Goeng bohlungz ranzlaj,

Gaj mou hung gvaq cieng,

De naeuz de ciengx yiengz,

Ngaenz rim sieng rim gvih.

Ndwencieng gaj mou hung,

Hoh bi lungz an’onj,

Ciengx yiengz mbouj siedbonj,

Gij ndei gyonj hawj de.

Rumzraeuj daengz vivaek,

Rumzbaek ngamq baema,

Goeng’au daengz ndaw naz,

Vid genga vanq bwnh.

Goeng’au miz simgei,

Ciengx nonsei ndaej canh,

Bi sou geijcib fanh,

De naeuz you ganq cin.

Daeg godangz ranzgwnz,

Okhwnz rej bauqciengh,

De rox guh rox siengj,

Dajciengx youh dajndaem.

De ngamq cawx ci moq,

Hai daengz laj roq ce,

Bouxgeq riuhehe,

Lwgnyez rej bauq hoh.

Daeg nuengxdangz ranzgyang,

Dang bing ngamq doxdauq,

Miz caiz youh baenz mbauq,

Bauj guekgya bingzan.

Vih guekgya ok rengz,

Bouxseng neix miznaj,

Bi lungz de coux yah,

Lajdeih bouxboux riu.

Yamq haeuj bi duzlungz,

Cejfung dienhvah daeuj,

Ranz de yaek guh laeuj,

Cingj raeuz gvaqbae gwn.

Cejfung youq ndawrungh,

Ciengx gungq youh ciengx baeu,

Bi lungz cawx ranzlaeuz,

Heuh raeuz bae goenghoh.

Coh de heuh Daegcau,

Bau reihnaz ndaem oij,

Yungh gihgai hai coij,

Noix haujlai goengrengz.

Reih oij heunaunau,

Sau mbauq sing fwen sang,

Raemj oij bae caux dangz,

Gwn ciengx ndang hohmingh.

Lajmbanj saeh ndei lai,

Baedauq nai mbouj liux,

Raeuz caiq haeuj singz yiuq(yawj),

Ciuh neix ndei mbouj ndei.

ndawsingz bienqvaq lai,

Gunghcangj baiz rim dieg,

Ci baedauq vuebvueb,

Buet ngoenz laep ngoenz haemh.

Cingsaenz Dangj daiq loh,

Bouxcoz haenq guhhong,

Sing go yiengj lumj gyong,

Boux guhhong sim’angq.

Gangj daengz raeuz Gvangjsih,

Lohloh cungj mizmingz,

Gunghcangj youq ndawsingz,

Ndaem ciengx ning(nauh) lajmbanj.

Mwngz yawj ndaw gunghcangj,

Lwgmbauq ganq dajbau,

Mwngz yawj gyoengq lwgsau,

Bouxboux mbouj lau hoj.

Byaekheu ndaem ndaw diengz,

Ciengx mou mbouj dai raq,

Doxgaiq miz daihbaj,

Onjsim gvaq ndwenngoenz.

Siz Ginbingz cujsiz,

Miz sim daeuj daiq loh,

Mbouj hawj raeuz gungzhoj,

Guekcoj cij bingzan.

De daeuj daengz Gvangjsih,

Vix raeuz byaij baenaj,

Baihgwnz daengz baihlaj,

Vah coenzcoenz son doh.

Daj baezneix baenaj,

Raeuz geiq vah cujsiz,

Yaek fatcaiz baenzmiz,

Guh ndi(ndei) doxgiet gonq.

Ndwenngoenz lumj raemx lae,

Hwnzngoenz bae mbouj dauq,

Bi duzlungz daeuj bauq,

Mbouj ndaej lauq ciuh vunz.

Bi lungz ngamq haidaeuz,

Saeh ndei gangj mbouj caez,

Daj baezneix doxbae,

Daengx vunz ndei gvaq ciuh.