Lingzvuengz nauh hwnj mbwn,

Deng baihgwnz cazbanh,

Gaemh hwnjdaeuj guenjhanh,

Naeuz famh diuz daengz diuz.

Bouxrwix Gozminzdangj,

Bak luenh gangj luenh naeuz,

Baij bingdoih dwk raeuz,

Gyaij naeuz bingz doenghluenh.

Dangj raeuz mbangj bouxdaeuz,

Vunz naeuz cix cimh bak,

Ndaq vunzmbanj fatbag,

Caksaeh hoj souciengz.

Donzfangzgiz(团防局) yaengx cax,

Gaj bae geijlai vunz,

Gwnz mbwn fwt fan rumz,

Geijlai vunz lae lwed.

Hozndat dungx youh haemz,

Vihmaz baenz yienghneix,

Cam mehmbwn mbouj leix,

Cam diegdeih mbouj han.

Mokfaenx naek cix naek,

Mbouj ndaej saek gyaeujroen,

Bya sang gaz baihdoeng,

Daengngoenz ciuqyiengh hwnj.

Mauz veijyenz daeuj daengz,

Vunzlai faengzyetyet,

Lumj gvaq cieng gvaq ciet,

Dieg Sienghgyangh angqyangz.

Mauz Cwzdungh youq neix,

Byaij cien leix roenbya,

Bae Cangzsah dauqma,

Ndaej ra ok caenleix.

Mauz Cwzdungh gvanbaz,

Raiz gaujcaz baugau,

Vunzlai angqvauvau,

Yawj dijbauj gvaq gim.

Faenzcieng mbouj coenz gyaj,

Haenh baihlaj baenz ndei,

Aen nungzvei rengzfeiz,

Vunzlai caez haeujcoengh.

Faenzcieng cungj vah deng,

Coi roengzrengz bae guh,

Gaej lau laih “cauhhux”,

Laebdaeb guh roengzbae.

Sam、Yaek Baenz

Cix Mbouj Baenz

1. Baengzyoux Baenz Vunzdig

Guhdoih hoenx baihbaek,

Da raen yaek ndaej hingz,

Byonghloh cix sou bing,

Dingz din cij hemq genx.

Yaek baenz cix mbouj baenz,

Dangq dwk nyaen deng duet,

Gaenriengz baihlaeng buet,

Ndang gyuek gyaenqsaengsaeng.

（8）