Seizneix, youq gyang naz haeux henjcwtcwt neix, souhgozgih hung lumj duzciengh youq diegnywj nei, menhnumq noddoengh. Sing fwen couh hwnj:

Souhgozgih gvej haeux,

Yaepyet couh gaiq naz;

Gvej fad vaiq dangqmaz,

Dwg fajfwngz raeuz guh.

Caiqlij yienghneix eu:

Ndaej gwn imq daenj raeuj,

Cienz baengh raeuz fajfwngz;

Roengzrengz caezgya hwng,

Gouz fangz mbwng’yaeng’yaeng.

Seizdoeng, gwnz mbwn osoem- soem, daengngoenz ronghsatsat, dienheiq raeujrubrub, doenghnaz raiz- banq. Ndaw dieg bauguh riuzcienj, gij saek gimhenj makvozganh daj gij saek loegheu mbawvozganh ndawde yet okdaeuj, caemh lumj gwnz mbwn ndaundeiq nei. Va’byaek baenz co baenz cumh, lumjbaenz yawj ndaej raen duzrwi、duzmbaj youq gwnzde foux hwnj foux roengz.

Ndaw doenghnaz vunz hix mbouj ndaejhoengq. Cae doeng、ndaem byaek、mbaet mak、gai gyoij、raemj oij, nyaengq lumj moed caux rongz nei. Cisamloek dienhdoengh rag mak sah- dangzgiz bae hawciengz nungzmau. Giceh hix rag oij bae dangzcangj, rag gyoij ok Gauhfungh.

Sing fwen hix cienz daeuj:

Hailangh geijcib bi,

Miz gwn caiq miz daenj;

Haeuj hag doegsaw gaenx,

Gaenq mbouj bae baiq saenz.

Gyoengqdou youq bak Duzsuh- yenz yawj doenghnaz, dingq vunz eufwen, caemh ndaej faen ndaej ok cingcing cujcuj: Bouxlawz dwg boh- lungz mehbaj, bouxlawz dwg boh’au mehsimj, bouxlawz dwg daeggo beix- sauj, bouxlawz dwg nuengxau nuengx- simj, bouxlawz dwg daegmbauq dahsau. Caemh faen ndaej ok byawz youq gyaeuj Byahau cuk suijgu; byawz youq Ndoibyarungh ndaem mak ndaem oij; byawz youq baih Cikgeiz dawz goengloh coih gvangq coih bingz; byawz youq laj din Byayamz hwnq laeuzmoq haubieg haubieg; byawz youq laj din Byayieng daengj diuz conghheuq sanggvanggvang.

Gyoengqdou youq bak Duz- suhyenz caenhcingz yiengjsouh gij gingjsaek doenghnaz gyaeundei neix!

Gyoengqdou youq laj bya cae naz rauq naz gvej haeux fad haeux, coih roen, hwnq ranz, hawj doenghnaz bienq mwn bienq heu bienq henj. Gyoengqdou couh mbouj dwg boux dawz doenghnaz veh baenz fuk dozveh gyaeundei neix? Gyoengqvunz youq gwnz bya ngonzyawj gij gingjsaek doenghnaz gyaeundei neix, couh mbouj dwg dawz gyoengqdou dangguh mbangj gingjsaek gyaeundei ndaw fuk veh neix lwi?

Gyoengqdou dwg canghveh, dawz doenghnaz veh ok baenz fuk baenz fuk dozveh doenghnaz! Gyoengqdou dwg yenjyenz, youq doenghnaz yienj ok baenz aen baenz aen “yingjben doenghnaz Dahbyayieng”! Gyoengq- dou dwg maz cungj baenz, ceiq youqgaenj dwg gyoengqdou dwg boux vunzguhnaz cingqcingq caencaen!

Gyoengqdou youq ndaw naz guhhong vihmaz? Vanzlij mbouj dwg vih bonjfaenh gwn、daenj、youq、byaij? Vanzlij mbouj dwg vihliux saedceij gvaq ndaej an’onj vuenyungz?

Doenghbaez gyoengqdou buek- mingh guhhong, lij gwn mbouj imq, daenj mbouj raeuj, byawz miz sim bae yawj gij gingjsaek neix? Cungguek moq laebbaenz caetcib geij bi, saedceij yied gvaq yied ndei, cij miz simcingz bae yawj doenghnaz bi beij bi bienq gyaeu bienq ndei. Geij bi neix daeuj, gyoengqdou ndaejhoengq caemh okrog bae youzangq geij baez, rogde gyaeu hix gyaeu raix, nauhyied hix nauhyied raix, hoeng, baez ma daengz mbanjranz dou yawj gij gingjsaek doenghnaz neix, caenh rox- nyinh engq doxndiep, engq maez- vunz.

Mbouj rox vihmaz? Aiq dwg gyoengqdou youq doenghnaz lae hanh lae lwed, cauh ok gij gingjsaek doenghnaz gyaeundei ba!

Boux vunzguhnaz, doenggvaq guhhong cauh ok gij caizfouq vuzciz!

Boux vunzguhnaz, caemh doeng- gvaq guhhong cauh ok gij caizfouq cingsaenz!

Doengh 《Yingjben·Doenghnaz Dahbyayieng》 gag dauj gag yienj neix, cingqcaen dwggyaez, yawj bak baez mbouj mbwq!（2 sat）