Bonjsaw, couh lumj duj va hai hoenghhwd, sanq ok heiq rangfwt gig maez vunz; bonjsaw couh lumj rangh diegbingz gvangqlangh ndeu, caih gou buet hwnj buet roengz, youz bae youz dauq; bonjsaw, couh lumj boux lauxsae codaeuz son gou, hawj gou doengh’uk nyinhrox gij saeh ndaw biengz. Gou gyaez bonjsaw, insik bonjsaw, engq haengj doegsaw.

Saw dangq aengingq ndaw sim gou, yawjraen de, couhlumj yawjraen swhgeij baenzlawz majhung. De dwg goekmboq coeng- mingz gou, dwk yingzyangj hawj gou, hawj gou cangqcwt majhung. De dwg gaiq namh oembwdbwd, gou cix dwg go rum iq mbouj haeuj da gwnznamh, miz de ciengx, gou ndaej majhung baenz aen suenva ndeu. Saw hix dwg baengzyoux gou, de yawj dou baenzlawz guhdoih majhung, de dwg baenz bonj baenz bonj dijbauj, geiq dwk baenz di baenz di saeh’iq majhung dou.

Lij geiq ndaej baezhaenx, daxmeh ien- uengj gou, gou gig utheiq, hoeng youh mbouj gamj hanbak, ndigah gou dawz saw daeuj yawj. Dauq dwg bonjsaw lumj yiengh doxgaiq hawj vunz simdingh nei, hawj aen sim nyapnyuk gou cingx roengzdaeuj; gij cihsaw caeuq gojgaeq ndaw saw lumj boux vunz hozraez nei nai gou hawj gou hozroengz. Daj neix hwnj, mwh gou deng utheiq simnyap, gou cungj ra saw daeuj yawjdoeg, hawj gij cihsiz ndaw saw nai swhgeij. Youq ndaw saw, gou ra ndaej gaiq siengjaeu, hawj swhgeij gagsaenq swhgeij miz bonjsaeh.

Miz baez ndeu, gou mbouj siujsim dwk bonjsaw dumz lo, ndaw sim gip ndaej dangq duzgungq ndaw rekhwngq. Gij cihsaw gwnz mbawsaw dumz bienqbaenz mumjgyumq. Gou ganjgip aeu cuihfunghgih siujsim sisi dwk cirumz, lau de deng loengh vaih, mbawsaw ci hawq le, cihsaw lij dwg myox, mbawceij hix nyaeuqnyatnyat. Gij nyaeuqnyat siu mbouj bae neix seizseiz daezsingj gou mbouj ndaej lumz gienh saeh neix. Bonjsaw sauj le, gou siujsim cuengq de dauq ndaw gvihsaw bae, ndaw sim caegcaeg mieng naeuz, baezlaeng caiq hix gaej sienghaih de lo, aenvih bonjsaw dwg lauxsae ndei gou hix dwg baengzyoux ndei gou, de son hawj gou baenzlawz simsoeng hozunq bae mienhdoiq haemzhoj caeuq daemdengj, baenz- lawz guh boux vunz engq ndei, baenzlawz dingjgeng caemdingh, baenzlawz hawj swhgeij bienq giendingh …… Mwh gou baez fan hai mbawsaw, doengh gawq vah hawj vunz uklingz haenx couhlumj lwnh gou ciuhvunz baenzlawz gyaeundei.

Vunz ciuhgeq naeuz:“Loh byaij mbouj daengz goek, saw doeg mbouj daengz byai.” Ndigah doegsaw, haenqrengz doegsaw cij doeg ndaej lai doeg ndaej raeuz, aeu lai doeg saw hix aeu gaenx bae guh, song yiengh dingh’aeu doxbang doxbouj.

Bonjsaw, dwg yw’ndei gou, gyoengqde hawj gou rengzloet caeuq mbeilaux; bonjsaw dwg baengzyoux ndei gou, buenx gou dohgvaq haujlai ndwenngoenz, hawj saedceij gou gvaq ndaej engq ndei engq lai cungj lai yiengh. Gou gyaez doegsaw, youh simhaenh doegsaw.

书，如同一朵盛开的花朵，散发着迷人的芬芳；书，如同一片广阔的平原，让我自由地畅游；书，如同我的启蒙老师，开启了我对这个世界的认知。我喜欢书，爱惜书，更享受读书的乐趣。

书是我心灵的一面镜子，看见它，仿佛看见了自己的成长历程。它是我智慧的源泉，给予我养分，让我茁壮成长。它是肥沃的土地，而我是土地上一株不起眼的小草，在它的滋养下，我成了一个花园。

书也是我的朋友，见证了我们一起走过的成长历程，也如同一本本珍贵的宝典，记录着我们的点点滴滴。

还记得那次，被妈妈冤枉时，很委屈，但又不敢反驳，于是我拿起一本书来阅读。而书就犹如一支镇静剂，让我烦躁的心平静下来；书中的文字和故事让我感受到安慰。此后，每当受到委屈的时候，我都会拿起书本，让书本里的知识慰藉自己的心灵。在书的世界里，我可以找到归属感和自信心。

有一回，我不小心把书弄湿了，心里急得像热锅上的蚂蚁。书页上被淋湿的字迹变得模糊。我赶紧拿起吹风机小心翼翼地吹着，生怕弄坏了它，书干透之后，字迹还是模糊的，纸张也皱皱巴巴的。这个消除不掉的痕迹时刻让我忘不掉这件事。书干了之后，我小心地把它放回书柜，心里暗暗发誓，再也不会让它受到任何伤害，因为书是我的良师亦是益友，它教会我如何保持良好的心态，微笑着面对困难与挫折，如何做更好的自己，如何保持冷静，如何坚定自己……每当我翻开书页，那些充满智慧的语句就仿佛在和我诉说生命的美好。

古人说：“书山有路勤为径，学海无涯苦作舟。”所以读书，苦读书才能走向成功，但既要读书也要勤奋，二者必须相辅相成。

书，是我的良药，它们给我力量和勇气；书是我的好友，陪我度过许多时光，让我的生活多出一抹艳丽的色彩。我爱读书，享受读书。

(lauxsae sonyinx: Luz Haijfangh Huz Bangjhangz/指导老师：陆海方 胡榜航)