Daihgya cungj mbouj cauz,

Nyi beix Mauz gangjgoj,

De lwnh raeuz saehmoq,

Citcit goj yinxdaeuz.

Daihgya mbouj cap bak,

Dingq daeg ak vaeh naeuz,

Gangj gungzhoj gaenyouz,

Lwnh raeuz baenzlawz guh.

Rengx nanz bungz doek fwn,

Angq baiq mbwn baiq deih,

Beix Mauz gangj dwg leix,

Bouxboux geiq ndawhoz.

Aen ruz youq gwnz haij,

Vaij bae baengh lozbuenz,

Bouxhoj daeuq bouxguen,

Mbouj “lozbuenz” mbouj ndaej.

“Lozbuenz” dwg gijmaz,

Daihgya sim fwt sangj,

Couh dwg Gungcanjdangj,

Ndaej gangj daengz guh daengz.

Coenzcoenz dwg caenleix,

Gangj ndaej doengh sim vunz,

Boux hoj daenj hoj gwn,

Dingq le sim aengfwg.

7. Gwnzmbwn Fwt Fan Rumz

Feizndoi raih haeuj ndoeng,

Dawz hoengzhoengz hwdhwd,

Miz vunz sim ndatfwd,

Lwed ndang gwdyauyau.

Causanh dangjcihbu,

Sikhaek guh ndaej baenz,

Mbouj dwg laeb guhcaemz,

Cingqcaen vih minzcungq.

Daiqlingx gyoengq vunzlai,

Buek dai dingj atcaq,

Ciengj bingrwix aeu cax,

Gaj hakdoj bouxvang.

Nauh ndaej hoenghhubhub,

Moeb ndaej luenhfoenfoen,

Hakdoj gag saethoenz,

Ra gyaeujroen deuz ndoj.

（7）