Boux guh reih guh naz,

Doxgap ha(hangz) caizcawj,

Mbouj saek di gvigawj,

Dauqcawq bae diemj ranz.

Mbanjmbanj laeb nungzvei,

Gauqseih seiqlengq nem,

Bouxdaeuz hemq ndaej rengz,

Gaemxgienz geng baenz diet.

Boux ndoet lwedhanh vunz,

Gyanghwnz ninz mbouj ndaek,

Mehmbwn naj bienq saek,

Raq fwn naek couh daengz.

Ranz miz ngaenz miz seiq,

Mbat neix boihseiz lai,

Saet daemznaz saet caiz,

Dai cix da mbouj laep.

Dauqdaej vih yienghlawz,

Byawz heuh sou nauhsaeh,

Aen biengz luenh yienghneix,

Bouxmiz ngeix mbouj doeng.

6. Coenzcoenz Dwg Caenleix

Dahliuzyangz song hamq,

Ungganq boux yinghyungz,

Raemx hwnj raemx youh roengz,

Hwnzngoenz ndaej guhcingq.

Raemx gwq lae gwq riuz,

Bya gwq heu mwncup,

Gyangranz feiz raeujrub,

Dawzyubyub gvaq hwnz.

Baenz gyoengq vunz lajmbanj,

Doxgangj mbouj sij deuz,

Haemhhaemh cix doxciuz,

Damq ra diuz caenleix.（6）