“Vei, veivei…… Boh a, dingq ndaej nyi lwi? Vaiqdaeh gou fat hawj mwngz haenx sou ndaej caengz?”

“Vei, veivei…… Lwg a, lij caengz, bouxsoengq ngoenzlwenz gaenq daj dienhvah hawj gou, gou guh sat hongnaz couh bae gwnz haw ndaw cin dawz.”

“Ndei, ngoenzlwenz gou hix gaenq lwnh mwngz nyi lo, ngoenzneix ndaejgeiq bae dawz bw! Seizneix gou yaek bae hwnjban lo, daengz banringz caiq daj hawj……”

“Ndi……Ndi……”

Soujgih boh mbouj miz saenq- hauh couh rox fat ok sing neix, boh hix gvenq lo. Mbanj de youq aen diegbingz iq ndaw ndoeng, ranz youq laj ndoi, naz youq gwnz ndoi, gek cibgeij goengleix cij miz mbanj wnq. Roen daengz diuz haw ndaw cin aeu byaij gvaq geij diuz lueg, bin gvaq geij aen bya, namh heiz gumz lai. Mbanj neix samcib lai bi bienq menh lai, mbangj mbanj caeux couh doeng hwnj muengx, daengz gizneix lij mbouj rox aeu caj geijlai nanz.

Boh cuengq roengz soujgih, siengj senj aen dieg caiq daj dienhvah hawj lwg, hoeng lwg mbouj caiq ciep lo. Soujgih neix dwg lwg de vih fuengbienh gangj vah bang de cawx daeuj. Seizneix gaenq yungh geij bi lai lo, boh baujguenj ndaej lij lumj yienghmoq, aenvih aen soujgih neix doiq boh daeuj gangj couh miz song cungj yunghfap——daj dienhvah caeuq yawj seizgan. Seizneix, hongnaz yaek guh sat, boh youh yawjyawj seizgan gwnz soujgih. “10：21 lo! Yaep bae daengz gwnz haw ndaw cin, boux- soengq hix aiq caengz roengzban.” Boh simyou hwnjdaeuj, baez bae gwnz cin aeu haujlai nanz, bouxgeq hai gyaq cimozdoz hix mbouj ndaej vaiq, aeu dawz vaiqdaeh couh aeu riengjret ganj bae. Boh vaiqdi guh sat hongnaz, cingjleix doxgaiq, riengz roen iq ndaw ndoi dauq mbanj ma ranz.

Daengz ranz, boh cuengq ndei doxgaiq, doi ok cimozdoz laux de cinj bae hawcinq. Aen mbanj neix, couh miz diuz roennamh doeng baihrog, lij mbouj miz huq ndei ok, faex lai hix aenvih roen rwix gai mbouj ok. Doiq bouxcoz mbanj neix daeuj gangj ce roengz couhdwg diuz lohgungz, bae baihrog dajgoeng guhhong dwg diuz roenok, lwg de hix okrog bae dajgoeng lo. Lai bi gaenxguh buekguh, lwg de youq ndaw gyoengqvunz neix baenz bouxak, youq ndaw singz guh seng’eiq hoenghhwdhwd, aeu boux mehmbwk ndei, lij miz boux lwgmbwk ndeigyaez youh gvaigvetgvet. Aen vaiqdaeh neix couhdwg lanmbwk senj hawj de guh laex ngoenzseng.

Naemj hwnj neix, boh sim’angq hwnjdaeuj. Gaxgonq aenvih boh mbouj siengj lizhai lajmbanj bae daengz aen singz mbouj sug youq, daengx ranz lwg de couh moix bi ndaejhoengq dauqma damq boh. Baezgonq lan- mbwk youwzyenz cuengqgyaj dauq- ranz, cingq bungz ngoenzseng boh, bak iq couh mboen naeuz cawx aen dangauh ngoenzseng hawj goeng guh laex, aeu baek baenzgong diuz lab. Boh hix baez daih’it youq mbanj neix gaen lanmbwk ciengq《Ngoenzseng Angqyangz》gvaq le aen ngoenzseng daegbied. Couhdwg, lwg nyaengq- nyatnyat, lwg lan mbouj ndaejhoengq dauqma geijlai. Siengj hwnj lanmbwk senj maz laex hawj bonjfaenh, boh hix miz saekdi angq.

Youq laj ndit gaenq hai gig nanz, yawjraen dingjranz gwnz cin, boh couh gyavaiq hai bae. Hoeng boh daengz diemq vaiqdaeh yawjraen bakdou gaenq gven. Boh miz saekdi geizgvaiq, aenvih moix baez duenh seizgan neix daeuj aen diemq neix cungj mbouj gven dou gvaq. Cam gvaq vunz cij rox seizneix gaenq 12：35 lo, caiq yawj soujgih, boh cij mingzbeg dwg seizgan soujgih loek lo.

Youh caj caenh ndeu, bakdou diemq vaiqdaeh ndaej hai, boh cij daj fwngz bouxsoengq ciep gvaq hab vaiqdaeh.

Mbwn ngamq laep, daengz ranz, boh dawz geuz menhmenh cek hai hab vaiqdaeh, biengj fa hwnj, aen soujgih cinwngz nda youq baihnaj. Boh dawz ok yawjyawj, youh mbon ok soujgih gaeuq de yawjyawj, naemj: Aen soujgih neix youh hung youh mbang, baenzlawz ndaej yungh ne? Mbouj naemj ndaej lanmbwk senj aen laex neix geiq daeuj.

“Ling…… Ling……” Seizneix soujgih gaeuq yiengj lo.

“Vei, vei vei…… Boh, mwngz sou vaiqdaeh ndaej caengz? Vuenh ndei soujgih moq lwi?”

“Vei, vei vei…… Lwg a, gou sou ndaej lo, couhdwg aen soujgih neix gou mbouj rox baenzlawz yungh, gou miz aen soujgih ndaej daj dienhvah、yawj seizgan couh ndaej lo, mbouj yungh mwngz cawx neix, yungh cienz lai ha, mbaet cienz hawj lanmbwk gou cawx gwn cawx daenj hix ndei ha!”

“Boh, neix caen mbouj dwg gou bang mwngz cawx, dwg lanmbwk mwngz yungh cienz hoengzbau de mbaet okdaeuj haenx bang mwngz cawx daeuj.”

“Lanmbwk gou bang gou cawx soujgih?” Boh dingq lo, naemj le naemj youh ciep naeuz:“Cienz hoengzbau lij dwg cienz sou gvanbaz ha, gou miz aen soujgih couh ndaej lo.”

“Boh a, seizneix lanmbwk mwngz cauz naeuz aeu caeuq mwngz gangj. Yaep mwngz aiq rox lo.”

“Vei, vei, daxgoeng, ngoenzseng angqyangz! Mwngz seizneix yungh hwnj soujgih moq lwi? Gou siengj caeuq daxgoeng sibinz doxgangj, yienghneix raeuz couh ndaej ngoenz- ngoenz doxraen la.”

“Sibinz doxgangj? O…… Dingq- naeuz gvaq. Gou seizneix caengz yungh soujgih moq, aeu caj gou hag rox gonq, raeuz couh ndaej sibinz doxgangj lo.”

“Wn, ngoenzcog gou caj dax- goeng……”

“Ndi…… Ndi……”

Saenqhauh youh mbouj miz lo, vuenh geij aen diegfueng hix caengz lienz hwnj, diuz mae ndawsim boh hix lumj deng raed lo nei. Hoeng vah gaenq dingq mbouj nyi, naj yaek yawj ndaej raen, “sibinz doxgangj” geiq youq ndawsim. Yawj “mbouj miz saenqhauh” gwnz soujgih, menhmenh cuengq roengz soujgih gaeuq, dawz hwnj soujgih moq, naemj: Aen soujgih gaeuq neix caeuq gou haujlai bi lo, laux lo, yied daeuj yied mbouj miz yungh lo. Moix bi gvaqcieng raen gyoengq bouxcoz dauqma fwngz gaem cungj soujgih neix, bibi vuenh aen, bi beij bi ndei. Gou lij wnggai sawqsawq vuenh aen moq, song goeng lan couh ndaej doxraen lo.

Boh song fwngz dawz soujgih moq neix fanj bae fanj dauq, ciuq sawgangjmingz, yungh saek seizgan cij ndaej mingzbeg baenzlawz hai. Caj daengz bingzmu rongh le nda youq baihnaj, boh cix mbouj rox baenzlawz guh lo. Gak cungj app, miz saeknding、saekheu、doz duzroeg…… Boh ra aen app heu diemj haeujbae, da raen danz ok geij coenz vah, boh mboujdaiq mingzbeg daeuj, sim couh dumdeng mbat anj, lwgfwngz hix dingz roengz lo. Ndaw mbanj lij miz bouxlawz ndaej son, saenqhauh seiz ndei seiz rwix, soujgih cinwngz youh baenzlawz ndaej yungh? Siengj hwnj naj lanmbwk, boh doiq soujgih neix loh ok saekdi fouznaih.