Gveigangj Si Cinzdangz Gih Mungzgungh Cin Lingzsw Siujyoz seiq (1) ban Yiz Suhhanz

贵港市覃塘区蒙公镇凌寺小学四（1）班 庾舒涵

Gaxgonq, daxmeh lijcaengz seng gou seiz, daxbuz doiq daxmeh gou naeuz:“Mwngz aeu seng lwgsai gaej seng lwgmbwk.” Daxmeh naeuz:“Ndei, gou itdingh seng boux lwgsai gvaigwd dwggyaez ndeu.”

Gvaq le mbouj geij nanz, daxmeh yaek seng lo. Daxbuz angq raixcaix, ndaw sim ngeix daxmeh itdingh dwg seng lwgsai. Doeklaeng cix seng boux lwgmbwk ndeu, hoeng daxmeh gou hix gig sim’angq.

Miz ngoenz ndeu, daxmeh bwnq gou gwn cuk, daxbuz daeuj yawjraen gou le, ndaw sim di hix mbouj angq. Miz boux mehsimj ndeu youq bangxhenz aemq boux lwgsai ndeu, daxbuz cam de naeuz:“Mwngz seng geijlai boux lwg lo?” Mehsimj naeuz:“Gou seng le song boux lwg cungj dwg lwgsai. Boux daihngeih siengj aeu dah lwgmbwk ndeu, hoeng cix dwg lwgsai.” Daxbuz naeuz: “Yiengh- neix gangj mwngz dwg siengj aeu boux lwgmbwk ndeu lo!” Daxbuz doiq daxmeh naeuz:“Caeuq de vuenh ndei mbouj ndei?” Daxmeh naeuz:“Mbouj, gou mbouj vuenh. Lwgsai lwgmbwk cungj dwg lwg.”

Gvaq le mbouj geij nanz gou maj hung lo. Dingq daxmeh gangj, daj de seng gou seizhaenx hwnj, daxbuz doiq ranz gou gig mbouj huzndei. De raen dou le, daengx ngoenz naj gig nanzyawj, cungj mbouj raen de riu gvaq. Geiq ndaej miz ngoenz ndeu, mwh de dingqnyi ranz daxau seng daeg nuengx ndeu, de riu ndaej bak cungj mbouj haep. Daj neix hwnj, daxbuz daengx ngoenz cungj rop daegnuengx iq daxau, doiq gou lienz yawj cungj mbouj yawj mbat he.

Gou naemj youq ndaw sim: Daxbuz, gou rox gou wngdang gingqgyaez mwngz, mwngz in’gyaez daegnuengx iq gou hix mbouj miz maz gangj, hoeng mwngz vih gijmaz mbouj gyaez gou di ndeu ne!

Geiq ndaej bihaenx gou caet bi, miz ngoenz ndeu, gou gwn ngaiz gvaq le couh bae hagdangz, mwh byaij daengz buenq loh fatyienh yienzbit mbouj raen lo, ngeix daengz banngaiz lij aeu gaujsi, gou couh ganjgip buet ma ranz. Ma daengz ranz baez yawj, bakdou gven dwk. Gou cijndaej bae daengz ranz daxbuz, siengj coh de ciq seiq gak ngaenz cawx gonj yienzbit ndeu. Hoeng daxbuz naeuz mbouj miz. Gou siengsim dwk okbae lo. Ngamq byaij daengz rog dou, couh dingqnyi daxbuz naeuz:“Lwgmbwk doeg gijmaz saw!” Dingq daengz gij vah neix gou gyaengj lo, song riz raemxda sikhaek bongh okdaeuj.

Lijmiz baez ndeu, ngoenzhaenx dwg ngoenzseng gou, daxbuz caeuq daxgoeng hix daeuj 1o. Daengz banhaemh le, dou gwn dangauh ngoenzseng seiz, daxboh daxmeh soengq duz lwgnyezbaengz hung ndeu hawj gou, youq najaek duz lwgnyez- baengz sij “hoh mwngz ngoenzseng vaiqlag” geij cih saw, ndaw sim gou angq raixcaix. Hoeng daxgoeng daxbuz lienz gawq vah hohfuk he hix mbouj gangj, neix dwg vih gijmaz ne! Daegnuengx iq youq roek bi ngoenzseng seiz, gyoengqde cix cawx aen ci iq ndeu hawj de.

Daxbuz, gou geijlai maqmuengh mwngz ndaej gaij cungj yawjfap maij lwgsai naiq lwgmbwk neix ha!

(lauxsae sonyinx: Yiz Suhyangz/指导老师：庾书扬)