Gveigangj Si Cinzdangz Gih Mungzgungh Cin Gauhcan Siujyoz sam (2) ban Yiz Gezyungz

贵港市覃塘区蒙公镇高占小学三（2）班 庾杰融

Daxgoeng gou bineix 72 hopbi lo, de aen ndang hungsang, naengnoh miz di ndaem, coengzlaiz mbouj cit ien, miz doih couh gwn di laeuj. De daengxngoenz cungj dwg cingsaenz gvaekgvaek, guhhong lij gig rengz bw!

Daxgoeng dwg boux “heiqmaez”, de gyaez yawj ciengqheiq, hix rox eu fwen, ndaw mbanj miz ciengqheiq, de cungj dwg caeuxcaeux couh bae hahdieg, youh dwg boux ceiq doeklaeng lizhai. De yawj densi daegbied gyaez yawj “Ginghgi”, de baez siengj yawj Ginghgi, couhsuenq dwg dahlan de ceiq gyaez haenx cingq yawj dung’vaben, hix deng de gyaep deuz.

Miz baez ndeu, daxboh guhhong ma caeux, de yawjyawj aen cung, aiya, NBA lanzgiuz bijsai daengz lo. Gou cingq yawj densi《Dahbya Gyaeundei》ne! Daxboh riu dwk naeuz:“Gyahgyah, ngoenzneix lanzgiuz bijsai gaenq hainduj lo, hawj daxboh yawj yaep ndeu ba, ndaej mbouj ndaej?” De itmienh gangj itmienh dawz densi yauzgung gaem gvaqbae, dawz densi diuz daengz dijyuz binzdau. Gou cij ndaej bae ra daxgoeng:“Daxgoeng, mwngz yawj, daxboh youh mbouj hawj gou yawj densi lo.” Gou ngamq gangj sat, daxgoeng couh naeuz daxboh:“Mwngz boux vunzhung ndeu, baenzlawz bae gaen lwgnyez ceng densi yawj, deuz, hawj Gyahgyah yawj.” Daxboh dingq le, cijndaej bae yawj bauqceij lo. Gou gig daekeiq, laihnaeuz densi dwg duhgou dingh lo. Hoeng, ngamq yawj yaep ndeu, daxgoeng yawjyawj aen cung, couh gvaqdaeuj doiq gou naeuz:“Gyahgyah, Ginghgi cezmuz cizboh youh hainduj lo, mwngz hawj daxgoeng sien yawj ba!” Gou cijndei dawz daiz diuz daengz Ginghgi cezmuz, daxgoeng yawjyawj gou, angqvauvau naeuz:“Ginghgi caen ndeiyawj, dwg monz yisuz ndeu, daihgya cungj gojyij yawj ma!” Gou mbouj guhsing byaij deuz lo, daxboh youq henz vix gou riunyaen ne!

Neix couh dwg daxgoeng gou, boux “heiqmaez” hung ndeu!

（lauxsae sonyinx: Cinz Caijfwnh/指导老师：覃彩芬）