“Seiqhenz aen liengzdingz Mbanjyivangz aeu dajndongj, fuengbienh vunzmbanj youq haenx diuq foux.”“Aen gyaq dwk lanzgiuz hagdangz gaenq vaih lo, aeu coih.” Mboengq- neix, youq ndaw laeuzgyong Yungzsuij Myauzcuz Swciyen Swyungz Yangh Yungzdi Cunh Mbanjhung, yangh ganbu caeuq vunzmbanj doxyaeng guhsaeh. Vunzmbanj naeuz doenghgij hanghmoeg bimoq guh aeu de.

Bimoq ngamq hainduj, Swyungz Yangh haiguh hozdung “banhaemh youq henz feiz gangjgoj”“youq ndaw dingz yaengsaeh”, cujciz dangjyenz ganbu haeuj mbanj haeuj ranz senhconz cwngcwz leih minz, cam siengjfap bouxminz, cam’aeu hwngfat yigen caeuq genyi, vih bimoq hwngfat comz siengjfap ndei, hawj vunzlai roxyiuj cwngcwz, coihawj aenbiengz huzndei hwngfat.

Ciuq cam rox, “banhaemh youq henz feiz gangjgoj” dwg Yungzsuij yungh gij fungsug haeuj ranz cunz ranz, humx youq henz feiz gangjgoj bonjdieg minzcuz daegbied gagmiz haenx, cujciz ganbu caeuq vunzlai gangjgoj, cam’aeu gij yigen caeuq genyi bouxminz, doxyaeng banhfap ndei guenj mbanj; “youq ndaw dingz yaengsaeh” dwg Yungzsuij yungh gij daegdiemj comz miz laeuzgyong、liengz- dingz bonjdieg minzcuz hwnq miz haenx, cujciz ganbu caeuq vunzlai haeuj doxgyawj, naengh doiqnaj gangjgoj, cam’aeu gij yigen caeuq genyi bouxminz, doxcaez yaenglwnh banhfap ndei guenj mbanj. Daengz 1 nyied 5 hauh, daengx yangh gungh guh 8 ciengz hozdung, sou ndaej vunzlai genyi 74 diuz, neiyungz baugvat gwn ciet cienzdoengj、hwnqguh roenloh、baujhoh swnghdai daengj.

(Liu Swjyenh/廖子渊)