1 nyied 6 hauh, Swcigih Dangj- veij suhgi Liuz Ningz naengh ci 7 aen lai cungdaeuz, bae daengz Hozciz Si Denhngoz Yen, gangj gij cingsaenz gangjvah youqgaenj Siz Ginbingz cungjsuhgi cazyawj Gvangjsih, hop- heux diuyenz gyamaenh gya’gvangq gij cwngzgoj vut gungz gunggeng、gihcwngz ceihleix、couqmaenh gij eiqsik caezcaemh Cunghvaz Minzcuz caeuq hwnqguh hanghmoeg hungnaek daengj, daegbied gangj daengz aeu haeujlaeg gvancez doeksaed gij iugouz fanghloz hungnaek Siz Ginbingz cungjsuhgi naeuz Gvangjsih haenx, gaenjndaet hopheux hwngfat ndei saed aen yinvu daih’it neix caeuq cauhlaeb aen gwzgiz hwngfat moq aen yinvu canloz neix, aeu couqmaenh gij eiqsik caezcaemh Cunghvaz Minzcuz guh sienqmeh, doeksaed gij baijbouh Aen Hoih Baez Caet Gaiq Cibngeih Swcigih Dangjveij caeuq Aen Hoih Hong Ginghci Daengx Gih, gejcuengq swhsiengj、cauhmoq gouz bienq, coh haij maeuz ak、haicuengq hwngfat, haenqrengz raiz bien faenzcieng Gvangjsih yiengh yendaiva Cungguek.

Cangzanh Gyahyenz Segih dwg Denhngoz Yen aen dieg anceiq buen dieg bangfuz dandog, 7500 lai boux vunz daj 13 aen minzcuz 9 aen yanghcin aen yienh neix daeuj haenx, byaij hwnj diuz roen vut gungz baenzmiz daj “byahung rungh laeg” daengz “Cangzanh Gyahyenz”. Liuz Ningz byaij haeuj segih dangjginz fuzvu cunghsinh, ciengzsaeq roxyiuj anceiq buensenj、gihcwngz ceihleix、minzcuz doxgiet caeuq saenqhwng lajmbanj mizgven cingzgvang. “2023 nienz 12 nyied 14 hauh daengz 15 hauh, Siz Ginbingz cungjsuhgi daeuj daengz Gvangjsih cazyawj caemhcaiq gangj gij vah youqgaenj, cungfaen haengjdingh hong Gvangjsih, yienq- mienx raeuz gejcuengq swhsiengj、cauhmoq gouz bienq, coh haij maeuz ak、haicuengq hwngfat, caenh’itbouh gangj cingcuj le mbaqrap hungnaek caeuq fuengyiengq roengzrengz hwnqguh yendaiva Gvangjsih.” Liuz Ningz naeuz, Siz Ginbingz cungjsuhgi youq mwh cazyawj Nanzningz Si Banzlungz Segih, caeuq boux guhhong segih nem vunzlai gangjgoj, yienq- mienx caezgya doxcaez roengzrengz, itdingh miz daengzcog engq ronghsag! Neix mboujdan dwg gikcoi raeuz lai, hix dwg naeuz rengzrwd.

Liuz Ningz naeuz, “yawjraen segih boiqdauq sezsih caezcienz, gak minzcuz vunzlai huzndei caezyouq, caezgya ndaej youq bakdou ranz guhhong couhnieb, gwndaenj ngoenz ndei gvaq ngoenz, dou angq raixcaix. Neix dwg gak baih caezcaemh doxgiet haenqguh ndaej daengz aen Dangjcunghyangh aeu Siz Ginbingz dungzci guh vaedsim giengiengz lingjdauj guh ndei baenz, ndaej leih cwngcwz ndei dangj, ndaej leih aen seizdaih moq hungmbwk.” Vunzlai dangdieg naeuz nyauznyauz, “caen gyo’mbaiq Siz Ginbingz cungjsuhgi、gyo’mbaiq Dangjcunghyangh.” Liuz Ningz maqmuengh gyoengq beix- nuengx vunzlai geiqmaenh vahdaengq Siz Ginbingz cungjsuhgi, gyo’mbaiq dangj、dingq dangj gangj、riengz dangj byaij, doxgiet caezsim, gaenxguh baenzmiz, gvaqngoenz yied daeuj yied ndei, hwnqguh segih yied daeuj yied gyaeundei, youq ndaw bi moq miz fuk、habhoz、vuenyungz、huzndei.

Aen Giuz Daegbied Hung Lungzdanh Denhngoz dwg aen gunghcwngz Nanzdanh daengz Denhngoz Yalauj gauhsuz goengloh, raez 2488.55 mij, dajveh bineix 1 nyied daej guh sat doeng ci, yaek guhbaenz aen giuz gungj ceiq hung seiqgyaiq. “Mwh Siz Ginbingz cungj- suhgi cazyawj Gvangjsih daegbied gangj daengz aeu laebdaeb gya- gvangq doiq ndaw doiq rog haicuengq, iugouz raeuz caezhwnq diuzroen moq luzhaij baihsae, guh buek hanghmoeg giekdaej sezsih gyaudoeng hungnaek ndeu.” Youq yienhciengz guh aen giuz, Liuz Ningz caeuq Cungguek Gunghcwngzyen yensw、giuzhung conhgyahcuj cujcangj、Gvangjsih Dayoz gyausou Cwng Gaihlenz gangj- goj, ciengzsaeq roxyiuj aen giuz hwnqguh dajveh cingzgvang, caensim gyo’mbaiq Cwng Gaihlenz yensw caeuq aendoih dinfwngz guh giuz caeuq gyoengq boux hwnqguh aen giuz haenqrengz gaenxguh, yienqmienx caezgya laebdaeb fatyiengz gij cing- saenz lauzmoz、gij cingsaenz guhhong、gij cingsaenz lauxcangh, dingjmaenh caetliengh daih’it、ancienz youq gonq, baujmaenh aen giuz aenqseiz guh sat doeng ci, cauhfuk gyoengq vunzlai henz roen.

(Cinz Yizcwz daj 《Gvangjsih Yizbau》 aeu daeuj genj hoiz)