Gveigangj Si Cinzdangz Gih Mungzgungh Cin Lingzsw Siujyoz seiq (2) ban Cinz Meijyangz

贵港市覃塘区蒙公镇凌寺小学四（2）班 覃美洋

Daj gou okseiq daengz ngoenzneix, nyangz gvaq haujlai saeh, youq gij saeh haenx ndawde miz gienh ndeu hawj gou gig nanzlumz.

Mwh gou ndaej caet bi bihaenx, miz ngoenz ndeu, aenvih gou caeuq daxmeh dingj bak, ndigah daxmeh couh fad gou ndaw cib ngoenz mbouj ndaej gwn saejdaeuz. Gou ngoenz he mbouj gwn saejdaeuz couh gig nanzsouh. Daxmeh simdoeg lai lo!

Miz ngoenz ndeu, gou nyaenx mbouj ndaej caeg gwn di saejdaeuz, gwn sat le ndaw sim gig lau, lauheiq deng daxmeh moeb. Doeklaeng fwt siengj, dawz gij baucang saejdaeuz yo hwnjdaeuj, mbouj hawj daxmeh yawjraen, yienghneix gou couh mbouj deng daxmeh ndaq lo. Gou lij caiq dem di saejdaeuz hwnjbae.Seizde ndaw sim gou lij daekeiq vauvau bw.

Banhaemh bet diemj lai cung, daxmeh roengzban dauqma, hai bingsieng okdaeuj baez yawj, raen saejdaeuz noix lo, sikhaek hozndat fwgfwg dwk naeuz:“Mwngz dwg mbouj dwg youh caeg saejdaeuz gwn la?” Gou cang baenz yiengh gig ienuengj naeuz: “Mbouj……mbouj dwg gou.”Daxmeh yawj gwnz diegnamh mboujmiz daeh saejdaeuz, couh byaij deuz lo. Seizhaenx sim gou cij cuengq roengzdaeuj. Gyanghaemh, gou gienq daxmeh ninz caeux di, daxmeh dapwngq lo. Gvaq yaep he, gou yawjraen ndaw rug daxmeh gven daeng lo, couh daj ndaw gvihbuhvaq dawz gojdung okdaeuj. Mwh gou mbek baucang, daxmeh couh byaij haeujdaeuj. Gou yawjraen gij yiengh hujdengdeng daxmeh, couh daej hwnjdaeuj lo. Daxmeh byaij daengz henz ndang gou, bang gou uet raemxda. Ngeix mbouj daengz daxmeh cix mbouj ndaq gou, dauq unqswnh naeuz:“Mbouj hawj mwngz gwn saejdaeuz dwg lau mwngz heuj in, mwngz siengj danghnaeuz heuj mwngz in lo vaih lo, couh mbouj ndaej gwn gij ndeigwn daxmeh guh haenx lo.” Dingq le gij vah daxmeh, gou ienqhoij raixcaix, sikhaek dawz saejdaeuz cuengq dauq ndaw bingsieng bae. Seizde daxmeh riu lo.

Yienznaeuz gienh saeh neix gvaq le haujlai bi, hoeng gou lij geiq ndaej gig maenh, aenvih gou itcig siengsaenq, daxmeh dwg boux vunz gwnz biengz ceiq gyaez gou haenx.

(lauxsae sonyinx:Lij Siujlij/指导老师：李小里)