Gveigangj Si Cinzdangz Gih Mungzgungh Cin Gauhcan Siujyoz sam (2) ban Lij Yijdungz

贵港市覃塘区蒙公镇高占小学三（2）班 李雨彤

Ngoenz singhgiz roek, daxmeh daiq gou bae ndaw doenghnaz gvej haeux.

Gou simvueng mbeilau dwk daeuj daengz ndaw nazhaeux, aenvih gou gig lau duznon iq, ndigah seiz mbouj seiz aeu bae fuengzre gij non raih gwnz din gou daeuj. Daxmeh raen gou mbouj onjsim guhhong, lau gou gaem liemz gvej sieng fwngz, couh cat din fwngz gou rim funghyouzcingh liux, yienghneix, duznon couh mbouj gamj daeuj raih gou lo, ndaek rinhung caemgywg ndaw sim gou cix cuengq roengzdaeuj lo. Daxmeh son gou:“Gaem fagliemz seiz, aeu gaem daengz giz swhgeij ceiq cwxcaih bae. Gvej gohaeux seiz, sien aeu byailiemz dawz gohaeux ngaeu hwnjdaeuj, doengzseiz yungh fwngzswix gaem maenh donhgwnz gohaeux, youz baihlaj coh baihgwnz yungh di rengz baez gvej, yienghneix couh mbouj yungzheih gvej deng fwngz lo, hix engqgya mbaetrengz lo.” Daxmeh itmienh gangj itmienh guh yiengh hawj gou yawj.

Gou sijsaeq dauqun gij fuengfap gvej haeux daxmeh gangj haenx, gungj hwet roengzdaeuj, fwngzswix gaem maenh haeuxfiengz, fwngzgvaz gaem ndaet fagliemz, hag bae haujlai nanz cij gvej ndaej song go haeux, gohaeux gvej goenq lo, hoeng caekhaex gou cix “boeb” naengh gwnz diegnaz lo. Gou sup gaemz heiq ndeu, laebdaeb gvej yaep ndeu, youh dawz gohaeux gvej goenq haenx cuengq ndei, “haj go couh byoz, haj go couh byoz”, gou youq ndaw sim menhmenh geq dwk. Mehbaj bohlungz byaij gvaq cungj haenh gou naengzganq, gou yienznaeuz miz di baeg, hoeng ndaw sim cix diemzsisi. Gou yied gvej yied vaiq lo.

Gvej ngoenz haeux ndeu le, gou cix caencingq rox daengz:“Ndaem haeux nditndat dak, hanh yag roengz namh lai, byawz rox haeux gwnz daiz, naednaed daiq sinhoj.”Gou hix gamjsouh ndaej daengz gij sinhoj gyoengq nungzminz mehbaj bohlungz. Gyoengqde sinhoj guhhong bi doek bi, dwg vih hawj raeuz ndaej gwn ngaiz hausaksak ndaw vanj gwnz daiz, raeuz aeu engqgya insik haeuxgwn, insik gij lwedhanh dwgrengz gyoengqde.

（lauxsae sonyinx: Cinz Cozli/指导老师：覃作利）