12 nyied 18 hauh, gih raeuz yaenqfat 《Aen Gietdingh Gvendaengz Dingh Coh Buek Daihroek Aen Gih Aen Danhvei Guhyiengh Minzcuz Doxgiet Baenaj Swcigih》, Hocouh Si Cunghsanh Yen、Cauhbingz Yen daengj 15 aen danhvei hwnjbuengj. Yiengh le, moix aen yienh Hocouh cungj aeu ndaej gij mingzdaeuz aen yienh guhyiengh minzcuz doxgiet baenaj swcigih.

Geij bi neix, Hocouh si gaenxmaenx cauhlaeb guhyiengh, cugbouh guh baenz aen daihbuenz aeu diemj lienz sienq、aeu sienq lienz benq、aeu benq daiq mienh. Bi 2022, Hocouh ndaej bingzguh “aen si guhyiengh minzcuz doxgiet baenaj daengx guek”. Daengz seizneix, daengx si miz 61 aen cizdij guhyiengh、101 vunz guhyiengh minzcuz doxgiet baenaj, aen gih aen danhvei guhyiengh minzcuz doxgiet baenaj guekgya gaep miz 4 aen, swcigih gaep miz 46 aen.

Baezlaeng, Hocouh Si yaek aeu couqmaenh gij eiqsik caezcaemh Cunghvaz Minzcuz bae guh hong gak gaiq, laebdaeb gungganq ok buek denjhingz ndaej guhmoq、doigvangq、souh ndaej gaujniemh ndeu. Caiq dwk ok aen binjbaiz cauhlaeb Hocouh “yungzyungz doxcoi caezsim cuk loqsiengj”, ok rengz Hocouh bae doidoengh Gvangjsih laebdaeb guh minzcuz doxgiet baenaj byaij youq daengx guek baihnaj.（Lij Cizbuj/李积埔）