舞出新生活

Daengngoenz doek roengz congh le, gizgiz dienhdaeng ronghsaksak. Aen gvangjcangz iq lajmbanj gwnzde, yinhyangj ninghumhum, yinhyoz biu haeuj rwz daeuj, ndeidingq raixcaix. Gyoengq boux youq ndaw mbanj couh gag rox, gwn caeuz imq gvaq le couh ndaej okdou bae diuq foux lo.

Seizgonq, gyoengqvunz ndaw mbanj guh reihnaz lai, vihliux ngoenz sam donq gwn imq, haetromh couh okdou, haemhlaep cij haeuj ranz, guhhong sinhoj youh dwgrengz, youq ndaw reih dauq daengz ranz gwn caeuz couh swiq din swiq naj ninz lo, mbouj ndaejhoengq hix mbouj miz sim okrog byaijbyaij roxnaeuz caeuq vunzlai doxcomz gangjgoj.

Seizneix, ndwenngoenz bienq ndei lo, gyoengqvunz lajmbanj mbouj yungh lumj seizgonq guh baenzlai hong, couh miz haujlai seizgan daeuj menhmenh gvaq- ngoenz lo.

Gwndaenj yied ngoenz yied ndei, gyoengqvunz lajmbanj lumj gyoengqvunz ndaw singz yiengh- neix, baenqloekloek mbouj ndaej daengx. Youq ndaw mbanj gou, gyoengq vunzlai couh gyaez diuq foux, gyanghaemh gwn imq couh boux heuh boux daengz gvangj- cangz iq bae diuq foux, lumj doxciuz bae haw nei, riuhaha guhdoih byaij ok ranz bae.

Youq aen gvangjcangz iq gwnzde, vunz lai vunz daih, miz bouxiq bouxgeq, miz bouxmbwk bouxsai. Bouxboux cungj riengz aen yinhyoz diuq hwnjdaeuj. Boux rox diuq caemhcaiq diuq ndaej ndei couh ndwn youq baihnaj diuq, boux mbouj rox diuq geijlai couh youq raeblaeng diuq. Mizseiz diuq loeng couh boux yawj boux riuhaha, haemhhaemh diuq foux cungj dwg riuriri angqfofo.

Ndaw mbanj gou miz geij dahsau ceiq gyaez diuq foux, hix duh gyoengqde geij boux diuq lai ndei. Geij dahsau neix bingz- ciengz youq ndaw mbanj son gyoengq vunzmbanj diuq, mizseiz hix okrog bae diuq. Geij dahsau neix diuq ndaej ndei, youh rox guhfwen dem, mbaenqlawz miz hozdung roxnaeuz guh vanjvei couh heuh gyoengqde bae diuq foux caeuq guhfwen, baez bae gyoengqde youh ndaej ngaenz youh ndaej gwn, moix baez doxdauq cungjdwg ndaenggwngj byaij haeuj ndaw mbanj daeuj.

Geij bi neix gvaqdaeuj, lajmbanj mbanjmbanj cungj miz vunz diuq foux, bouxboux ndawsim vuenyungz youq an’onj. Diuq foux yied diuq yied haisim, diuq ok doxhuz, diuq ok gij yiengh moq.