Sai:

Bae ranzmiuh souj cai,

Gienq nuengxgvai,

Gaej simlai guhyoux;

Raemx lajdah baenqlouh,

Gaej ra youx,

Youq caj beix caux ranz.

Daeuj gyang nguemz neix naengh,

Dawz sim maenh,

Ciuq caemhsaemh vunzlai;

Bae ranzmiuh souj cai,

Gienq nuengxgvai,

Gaej simlai guhyoux.

Roegenq gvax ndaw ranz,

Ndaw sim van,

Gizsang go mbouj douh;

Raemx lajdah baenqlouh,

Gaej ra youx,

Youq caj beix caux ranz.

Mbwk:

Siengj beix simdaeuz mbin,

Luenhlingling,

Yaek rouxringx gyang ranz;

Siengj beix mbouj gangjbyangz,

Naengh dou ranz,

Simdaeuz fan baenz bingh.

Gyaez beix lai simfanz,

Mbouj cangndang,

Ce ranz mbouj roxnyinh;

Siengj beix simdaeuz mbin,

Luenhlingling,

Yaek rouxringx gyang ranz.

Sau gyaez mbauq baenzlai,

Caemh daiz naengh,

Haengj vaiq ndaej caux ranz;

Siengj beix mbouj gangjbyangz,

Naengh dou ranz,

Simdaeuz fan baenz bingh.

Sai:

Lwgfwx caih naeuz lawz,

Dingh simdaeuz,

Nuengxngeih naeuz mbouj ngaih;

Caemh diuz roen ndeu byaij,

Caen dahraix,

Caez byaij bae gizgyae.

Haemhlaep ciuq ndaundeiq,

Gaej danqheiq,

Geiq vah song boux raeuz;

Lwgfwx caih naeuz lawz,

Dingh simdaeuz,

Nuengxngeih naeuz mbouj ngaih.

Danh lajdah miz bya,

Naeksim ma,

Beix vad saz hwnj raiq;

Caemh diuz roen ndeu byaij,

Caen dahraix,

Caez byaij bae gizgyae.

Mbwk:

Yo miuh coq laeng ranz,

Lai angqyangz,

Guhranz caj naezyou;

Cingqging cingj daeuj youq,

Daengz seizcou,

Raeuz song boux baenzranz.

Doengz youq laj dienyah,

Gaej gangj gyaj,

Dingh caj nuengx caux ranz;

Yo miuh coq laeng ranz,

Lai angqyangz,

Guhranz caj naezyou.

Ndaem va coq henz roen,

Va hai mboeng,

Rwi baenz boengj daeuj douh;

Cingqging cingj daeuj youq,

Daengz seizcou,

Raeuz song boux baenzranz.