Ndwenngoenz couh lumj aen bingz cang haj cungj feihdauh ndeu，soemj、van、haemz、manh、hamz，yienghyiengh cungj miz. Raeuz cimz le gij haemz ndaw ndwenngoenz，engq aeu ciengzseiz nyaij gij van ndaw ndwenngoenz.

Guhsaeh ndaejbaenz hawj gou sim- angq simvan. Daj siujyoz it nienzgaep hwnj，gou couh hainduj hag danz guj- cwngh lo. Ndaejgeiq dangz goq daih’it，gou hag le dangz goq baenzlawz naengh、fajfwngz baenzlawz cuengq caeuq lwg- fwngz baenzlawz danz. “Baihlaeng aeu ietsoh，gaej gungj. Fajfwngz aeu venj hoengq，gaej dap youq gwnz yienzgimz.”Lauxsae yiemzhaenq dwk naeuz. Dangz goq he roengzdaeuj，gou naiq dwk hwet in ndang naet，gen cungj daiz mbouj hwnj lo. Hoeng gou seizseiz cungj geiqmaenh “guh sug cij baenz sae” coenz vah neix， hag le yiengh bae coh yiengh，gou hag rox baenzlawz yungh lwgfwngz danz ok doenghgij singdaenh、singrodhwnj. Aenvih lauxsae gig saenq gou yawjnaek gou，ndigah gou engqgya gaenxmaenx. Mwh gyajseizhwngq bi’gvaq，gou caepcawq gauj cib gaep. Mwh gaujsi gaxgonq，gou engqgya roengzrengz lienh，gingciengz baez lienh couhdwg lienzdaemh lienh song aen lai cung，fwngz gyaengj lo，baihlaeng hix ndaek lo，hoeng gou youq ndawsim naeuz hawj lajndang：Mbouj ndaej cuengqsoeng，vihliux aeundaej cingzcik ndei，itdingh aeu gaenxmaenx. Ngoenz gaujsi de，gou sim’onj cwgcwg byaij haeuj ndaw gaujcangz，gou danz ok diuz go ndei dingq raixcaix he，lajndang gou cungj simmaez lo. Mbouj nanz，gou aeundaej le mbawcingq cib gaep，ndawsim diemz- subsub.

Vah haenh daxmeh hawj gou simvan. Baezgonq singhgiz ngeih，gou camgya le ranzhag yenjgyangj doxdax. Gou gangj mbouj rox liux，lij louzsim yungh lwgda caeuq bouxyawj doxdoengh，baijok gij yienghceij ceiq ndei bonjfaenh. Lumj gaenq liuh daengz nei，gou aeundaej itdaengjciengj. Ma ranz le，gou miznaj dwk daj ndaw daehsaw dawz mbaw cwngsuh okdaeuj，hawj daxmeh yawj. Daxmeh sim- angq lumh gyaeuj gou，haenh naeuz:“Mwngz ak dahraix! Mwngz caen hawj gou roxnyinh najrongh ha.” Gou dingq le，ndawsim lij van gvaq gwn dangz.

Bang vunz ndaw ranz guh hongranz hawj gou simvan. Bang daxmeh baetbaet ranz、bang daxboh swiqswiq duix……Yawj gij najriu gyoengqde，ndaw sim gou vandiemz liux lo.

Youq ndaw ndwenngoenz miz gak cungj feihdauh，hoeng feih van ceiq lai. Cijaeu raeuz yunghsim bae cimz，itdingh ndaej cimz daengz!

(Yangz Gyahyungz/raiz

Lij Lungzfangh/hoiz)