4. Diuz Neix Caen Dauhleix

Miz geijlai hauxseng,

Roengzrengz bae gyaep loq,

Sanghaij《Bouxcoz Moq》,

Yinx roenloh hawj vunz.

Saw《Sienghgyangh Bingzlun》,

Gejlwnh saeh gwnzbiengz,

Yienghyiengh cungj gangj bieng,

Vunz daeuj riengz daeuj cimh.

Raeuz miz rengz mbouj lau,

Rinbya ngauz ndaej lak,

Boux vunzhong ceiq ak,

Mbwn lak dangq bengzgve.

Ngozgoz lingh laeb guek,

Bouxhoj buek ndaej baenz,

Doxgap guh ndaej daengz,

Diuz neix caen dauhleix.

Buwjsizveizgwz,

Gauj gwzming ceiq haenq,

Bouxdaeuz Lezningz maenh,

Daengx biengz haenh mbouj dingz.

Gyo Maj-Lez Cujyi,

Lijlun ndaej yungz nae,

Bouxhoj yaek baenz ndei,

Caez doxgiet hwnjdaeuj.

5. Gungcanjdangj Laebbaenz

Gak dieg mbangj hauxseng,

Haenqrengz ceng minzcuj,

Laeb gungcanj siujcuj,

Mieng caux guh lingh biengz.

Gak lengq aen siujcuj,

Lumj duj vadauz doeng,

Duj hau duj maeqhoengz,

Muengh ngoenz gyonj caez angj.

Ngoenzde ndaej daeuj daengz,

Daengngoenz hwnj hoengzoq,

Sanghaij Muenghceiqloh (vangcilu),

Aen hoih moq hai baenz.

Ngoenzde ndaej daeuj laeuh,

Fagfouj caeuq fagliemz,

Gwnz ruznding giet yienz,

Haeuj biengz gaij diendeih.

Yaek hag yiengh Suhlenz,

Lienzhab gyoengq bouxhoj,

Naemj laeb aen guek moq,

Hawj bouxhoj miz gwn.

Bi 1921,

Mbwn roh ndit daengngoenz,

Dangj yeix ok diuzroen,

Raeuz gvej oen baenaj.

Yawj dwg lwg gyoqfeiz,

Beiz rumz rox dawz haenq,

Caih vunz saenq mbouj saenq,

Feiz haenq ndaej coemh ndoeng.

Boux souh hoj souh nanh,

Doxcanj daeuj gaenriengz,

Dangq diemj feiz coemh fiengz,

Raih dawz lienz baenz benq.

Gungcanjdangj laebbaenz,

Vunzlai raen maqmuengh,

Ninzloq hix caemh siengj,

Gwndaenj bienq baenz ndei.

Cungguek Gungcanjdangj,

Cix dangq aen daengngoenz,

Venj gyangmbwn baihdoeng,

Ciuq rongh roen rongh loh.

Ngeih、Fwnrumz Geujhumhum

1. Ndaej Mbouj Ndaej Byaij Bae

Ndaej mbouj ndaej byaij bae,

Miz manaez miz guk,

Lwgnyez ngamq ok mbuk,

Raen guk mbouj rox lau.

Naj roen gyae’gyanggyang,

Miz yiengh dangj yiengh gaz,

Deng hamj dah bin bya,

Deng viq nya dangh raemx.

Viq nya cix viq nya,

Daihgya mbouj lau hoj,

Diegdeih mbouj miz loh,