Byawz rox daengz dou ngamq- ngamq caeg aeu ndaej geij aen lwgndae henj, Baeuqsam mbouj rox seizlawz bae doengh guhhong dauq ranz lo, raen dou caeg aeu gij lwgndae de, doq ndaq naeuz:“Yoho, yienzlaiz dwg geij lwg byaiz sou na, dawz baez ndeu lo, haemhneix gou aeu lwnh hawj bohmeh sou nyi cij ndaej, yaep dem hix bae hagdangz lwnh lauxsae sou nyi……” Baeuqsam doq maenj doq coh dou byaij gvaqdaeuj naeuz gaemh vunz, mbouj rox de dwg guh caen roxnaeuz guh gyaj. Dou geij lwg hujgeiq lau ndaej nyouh rih dangzvaq bae, naj bienq fangz liux, lwgndae hix mbouj gamj aeu lo, doq buetdeuz hwnj gwnz bya baihlaeng bae ndoj. Ngoenzhaenx banringz ndoj youq ndaw gamj gwnz bya mbouj gamj bae hagdangz, daengz haemh laep le hix mbouj gamj dauq ranz. Gvaqlaeng youq ndaw mbanj baez raen Baeuqsam dou couh lumj duznou raen meuz nei, caegcaeg buetdeuz liz de gyae’gyae bae. Gvaqlaeng, dou fatyienh moix bi daengz seizcou lwgndae yaek henj couh raen Baeuqsam ciengzciengz naengh youq bakdou ranz yawj coh go mak lwgndae de luenghliengz, gij lwgndae de venj rim gwnz go, henjrwgrwg, dou caiq ngah ndaej myaiz rih roengzdaeuj hix mbouj gamj cimz lo.

Saedceij couh dwg yienghneix menhmenh gvaqbae, daengngoenz doek roengz congh, ronghndwen youh hwnjdaeuj, gij lwgndae Baeuqsam ciuqgaeuq bibi henj, gou caeuq gyoengq hujgeiq yied bi yied majhung, lizgyae mbanjranz okrog bae doegsaw, doeg gauhcungh, doeg daihhag, mbangj hix okrog bae ra gwn, youq baihrog cawx ranz cawx riengh youq lo, mbangj hix okbae youq danhvei miz hong guh. Roxnyinh ranzcoj hix liz dou yied nanz yied gyae lo, dou hix mbouj miz seizgan dauqbae yawj de, hix mbouj miz seizgan dauqbae yawj gij lwgndae Baeuqsam seizlawz henj dem lo.

Byaij haeuj mbanj yaek daengz henz ranz Baeuqsam lo, raq rumzcou he ci gvaqdaeuj, miz ngeu heiq homvan ndeu ci haeuj ndaeng gou daeuj, yi, gij homvan neix mbouj dwg feihdauh lwgndae ma? Gou fwt singj gvaqdaeuj, ngiengx gyaeuj baez yawj, gwnz go makndae venj rim lwgndae aen lumj aen henjrwgrwg, ngaem gyaeuj yawj laj goek makndae loenq miz haujlai lwgndae, mizmbangj gaenq naeuh lo, cungj mbouj miz vunz daeuj gip ne.

Raen Baeuqsam boux vunz ndeu naengh youq bakdou ranz lumj ngeix maz nei. De hwet gungj vunz byom, naj reuq, byoem gyaeuj gaenq hau liux lo, gou byaij gvaqbae dongx de, de cam naeuz gou dwg byawz? Gou riu naeuz gou dwg boux neix boux neix, seiz lij iq ciengz daeuj caeg gij lwgndae mwngz bw, mbouj rox geiq la? De ngauzngauz gyaeuj.

Riengz Baeuqsam gangjgoj, cij rox Buzsam senq gvaqseiq lo, haujlai bouxgeq hix gvaqseiq lo, dah lwg de haq bae giz dieg gyae gaenq haujlai nanz mbouj ndaej dauq ranz yawj de lo. Gangj daengz seiz doxdauq, Baeuqsam cam naeuz seizneix sou deuz gvaq gizlawz bae liux mbouj raen dauq ha? Gou naeuz Daeghenj youq Hozciz dang lauxbanj, Daeglingz youq Guengjdoeng cawx ranz, gou youq yienhsingz guhhong……

Gangj le haujlai nanz, baedauq cungj dwg lwnh goj seizgonq. Doeklaeng, Baeuqsam danq gaemz heiq he naeuz:“Meh mwngz gai lwgsawz ni, seizgonq gou lau lwgnyez daeuj caeg, seizneix lwgndae henj venj rim gwnz go, henj le doek roengz lajgoek rim bae, muengh naeuz hawj geij lwg fangzbyaiz sou daeuj caeg, hoeng caiq hix mbouj raen sou daeuj caeg dem lo.”

Gou yawj coh rog mbanj gizgyae bae ngeixloengloeng, giuzndaeng roxnyinh miz di soemj, mbouj rox baenzlawz gangj.

（2 sat）