Seizcou dwg geiqciet fungsou, caemh dwg seiz doxngeix.

Ngeixdauq gij bi’ndwen ceiq- ndei seiziq gou, cix dwg youq mbe naz neix guhcaemz, mbatmbat ngvanh daengz mbe naz neix, raemxda gou cungj rihnang- nang……

“Goeng ha! Duzma de buet roengz naz bae lo.” Gou sing hung hemq hawj daxgoeng nyi. Gaenlaeng daxgoeng cix daj ranz byaij okdaeuj, daiq gou buet bae ndaw naz……

Youq ndaw naz haenx gou aeu va’iq ma coengh duzma de cang- ndang, gaenlaeng caiq yawj daxgoeng gvej haeux. Gou caemh aeu doengh gaiq va’iq de ma guh aen gvaengzva ndeu hawj bonjfaenh, gou daep hwnj gwnz gyaeuj bae, daxgoeng haenh gou dwg boux lwgnyez ceiqndei daih’it, duzma hix laeng gou bi rieng, buet bae buet dauq.

Youq duenh roen ma ranz haenx, gou gwih max youq gwnz hoz daxgoeng, ndaw fwngz gaem aen maenzsaz ndeu, maenzsaz faenmingz mbouj dwg gij doxgaiq ceiq feih gwn, hoeng gou gwn feih dangqmaz, aenvih aen maenz de dwg daxgoeng saz hawj gou.

Gwn haeuxcaeuz sat, gou dawz hab le caeuq daxgoeng guhdoih bae nazhaeux, daxgoeng naeuz miz gohaeux caet saek, dou bae ra gohaeux caet saek de. Hoeng gou baenzlawz ra cungj ra mbouj raen, rumzhaemh boq gvaq ndaw naz, couh mup daengz heiq rang gohaeux de. Daxgoeng daiq gou naengh youq gwnz rin de dak rumz yiengjsouh, onj ndei raixcaix……

Bi’ndwen yaep da couh gvaq lo, daxgoeng bae haujlai bi lo, hoeng duenh bi’ndwen neix gou baenzciuh cungj mbouj lumz, youq seiznyez gou, daxgoeng dwg boux vunz ceiq youqgaenj gou.

(Ciengj Sihyi/raiz

Veiz Munglingz/hoiz)