Cuengqhag lo, gou ciuqciengz youq ranz raiz cozyez. Sawqmwh, miz aen doxgaiq ndeu mbin daengz baihnaj gou, gou baez yawj, gingqyienz dwg aen gihseizgan saekhenj ndeu. Aen gihseizgan gangj: “Angqcoux mwngz daeuj daejniemh gij mbanjranz gvaq ngeihcib bi haenx!” Gou siengj: Lij miz cungj saehndei neix? Gou gig geizheih, sikhaek diuq haeujbae.

Miz haujlai aencung youq baihnaj gou cienjdoengh. Sawqmwh, “ba” gou doek roengz gwnz namh.

Gou haida baez yawj, “va, ndei- yawj raixcaix, neix couh dwg gvaq ngeihcib le gij yiengh mbanjranz gou?” Gou nyaenx mbouj ndaej haenh naeuz. Gou mbouj ndaej youq gizneix lo. Doeklaeng gou daeuj daengz haenzdah.

Raemxdah sawdikdik, nyeux- gyaeuj baez yawj, bya sang lueg laeg. Gou youh haenh naeuz: “Va, mbanj- ranz gingqyienz bienqbaenz yiengh- neix, ndeiyawj raixcaix lo!”

Gou wnggai baema ranz lo. Gou ndaw sim naemj.

Gou bae youq gwnz roen, bae gvaq aen suenmak. Gwnz gomak aenaen bizbwtbwt lumj gyoengq lwgnyez ndeigyaez. “Mwngz ndei!” Miz boux vunzgihgi gangj coh gou. Gou deng gij sing neix hwk lo. Gou nyeuxgyaeuj baez yawj, dwg boux vunzgihgi caeuq boux goenglaux henyawj suenmak. Gou byaij bae cam: “Mwngz ndei, goenglaux, mwngz baenzlawz miz boux vunzgihgi ne? De aeu ngaenz lai lwi?” Goenglaux riu naeuz:“Vunzgihgi ranzranz cungj miz, mwngz lij cam gou aeu ngaenz lai lwi!” De youh han naeuz:“Mbouj aeu ngaenz lai, cawx boux vunzgihgi mbouj aeu daengz hajcib maenz ne!” Dingq le gij vah goenglaux, gou naemj:Va, mbanjranz gou gvaq ngeihcib bi baenzneix geizheih!

Gou youh byaij ha byaij, doek- laeng ma daengz ranz swhgeij lo.

“Yi, ranz baenzlawz youq gyang- mbwn?” Gou heuh naeuz. Daxmeh dingqnyi sing heuh, roengz laeuz lo, byaij daengz dangqnaj gou naeuz:“Mwngz cungj mbouj rox ha? Seizneix ranzranz cungj yienghneix, vih ancienz, gyoengqvunz genj ranz cuengq youq gyangmbwn, mwh roengzdaeuj, mbouj yungh byaij loh, aen ruz seizhoeng rox soengq raeuz bae giz siengj bae de.” Gij vah daxmeh hawj gou doeksaet yatyat.

Haeujma ndaw ranz, engqgya cinwngz lo……

Daengz mwh gwn ngaizringz, daxmeh ndenq aen daehgau ndeu hawj gou. Gou cam daxmeh: “Vihmaz hawj gou aen daehgau ndeu, byaek ne?” Daxmeh riu naeuz:“Seizneix ha, bek aen daehgau baez ndeu couh miz byaek okdaeuj lo!” Gou bek yaep he, caen miz byaek okdaeuj dahraix.

“Biu” sing ndeu, aen gihseizgan haenx caiq baez mbin ma daengz baihnaj gou: “Daejniemh seizgan sat, cingj baema!” Gou cij mbouj ndaej mbouj ma ranz lo.

A! Gvaq ngeihcib bi le mbanjranz geijlai gyaeundei、 geijlai fouqmiz、 geijlai mizyinx ha.

（指导老师：覃东花）