It、Mbwn Roh Ndit Daengngoenz

1. Moenghsiengj Youq Gizlawz

Rumzbaek ci fidfid,

Seiqlengq nitsisi,

Gwnz dieg gaiq mbouj miz,

Gizgiz nae hausak.

Naehau doek rim gai,

Yienghyiengh dai mbouj lix,

Biengz funghgen cujyi,

Cizminzdi duh vunz.

Gwnzbiengz caenh ienlaux,

Nyaux boek cienfanh ranz,

Bouxcangq bienq bouxcanz,

Gannanz gvaq saedceij.

Fwj deih mbouj raen mbwn,

Mokfwn cw laep doh,

Diegguek dangq gaiq noh,

Vunz baenz gyoh gvej bae.

Seiqdauh luenh baenzneix,

Dienleix youq gizlawz,

Raeuz mbouj huk mbouj ngawz,

Guhlawz hawj nyoegnyamx.

Gimq ien youq Hujmwnz,

Guekvunz ndaej ceng naj,

Sanhyenzlij dawz cax,

Moeb gaj vunz Yinghgoz.

Ginhdenz rumzgeujgaeq,

Yaek fonj deih boek mbwn,

Sunh Cunghsanh daiq vunz,

Rag Cinglungz roengz max.

Vuengz ceih geij cien bi,

Mbouj saek di bienq yiengh,

Ciuh doek ciuh hoenxciengq,

Moenghsiengj youq gizlawz.

2. Mwhlawz Ranz Cij Rongh

Mbangj vunz youq mbouj dingh,

Heiq minghyinh guekgya,

Bae rogguek damqra,

Daiq dauqma “ywbauj”.

Guekcingz mbouj doxdoengz,

Hengz mbouj doeng luenh foux,

Gyaeqgaeq mbouj miz boux,

Nyaemhfaeg mbouj ndaej baenz,

Miz vunz heuhvaekvaek,

Yaek hag yiengh baihsae,

Yied gauj yied boihseiz,

Cix deng feiz coemh remj.

Miz vunz gag naeuz gvai,

Ninz gvaiz doq guh loq,

Caemh yaek gouq guekcoj,

Gaijliengz loh mbouj doeng.

Sam goengq bya sangsad,

Dimzat raeuz lwgminz,

Roxnyinh ndokndang in,

Cix oksing mbouj ndaej.

Cam mbwn mbwn mbouj han,

Mwhlawz ranz cij rongh,

Dou soemhlaep buetbongh,

Byawz ciuqrongh naj roen.

3. Ndiu Cien Lueg Fanh Ndoeng

Gwnz gyaeuj byaj ronghyab,

Fwj luenhlab caux fwn,

Ngozgoz vuenh aen mbwn,

Caez caemh gwn caemh guh.

Ndwencib cix byajraez,

Rumz geuj bae geuj dauq,

“Ahfuzlozwj” hauh,

Singbauq saenq doh biengz.

Rumzcin daengz Cungguek,

Ndiu cien lueg fanh ndoeng,

Mbangj hauxseng sim hoengz,

Roengz sim guh gwzming.

Lij Dacauh ak lai,

Raiz saw coi vunz singj,

Caeuq ciuzdingz doiqdingj,

Vutmingh cungj mbouj lau.

Lij miz Cinz Duzsiu,

Roxyiuj lijlun lai,

Ok saw son vunz gvai,

Lumj hai cueng ronghsag.

Caiq boux Couh Wnhlaiz,

Gvai gvaq vunz gvaq doih,

Youq hagdangz comzhoih,

Daiq doih byaij baihndei.

Daegcoz Mauz Cwzdungh,

Fatdoengh gyoengq hagseng,

Gauj siveih youzhengz,

Caez bae ceng bingzdaengj.

（1）